لە سنووری پارێزگای دهۆک چەکدارانی پەکەکە گەنجێک دەڕفێنن
گەنجەکە ناوی "شکیب عەلی رەزگەی"ەو ڕۆژی (٢-٩-٢٠١٩) لە سنووری شارۆچکەی شیلادزێ لەلایەن چەکدارانی پەکەکەوە ڕفێندراوە، لە مبارەیەوە شوکری عەلی، برای گەنجە ڕفێندراوەکە ڕاگەیاند: "دوو ڕۆژ پێش ئێستا براکەم کاتێک سەردانی ناوچەی گەلی باڵندەی لە سنووری شیلادزێ کردووە لەلایەن چەکدارانی پەکەکەوە بە گوللە بریندار کراوە و دواتریش ڕفاندوویانە".
گوتیشی: "براکەم هیچ تاوان و هەڵەیەکی نەکردووە نە بەرامبەر پەکەکە نە هیچ لایەنێکی دیکە و دوو ڕۆژە بە برینداری لەلایەن چەکدارانی پەکەکەوە دەستبەسەر کراوە و کەسوکارمان سەردانی پەکەکەیان کردووە بەڵام براکەمیان ئازاد نەکردووە".
ناوبراو داوای لە لایەنە پەیوەندیدارەکان کرد کە هەوڵی خۆیان بۆ ئازادکردنی براکەی بخەنەگەڕ و بەسەلامەتی بگەرێتەوە.
سەبارەت بە بابەتەکە رائید عەشقی محەمەد، بەرێوەبەری پۆلیسی شارەدێی شیلادزێ لە لێدوانێکیدا هەواڵەکەی پشتڕاستکردەوە و گوتی: "ئێمە ئاگاداری رووداوەکەین کە گەنجێکی شیلادزێ لەلایەن چەکدارانی پەکەکەوە بریندار کراوە و دواتر ڕفێندراوە بەڵام لەلایەن کەسوکارەکەیەوە بە فەرمی ئێمە ئاگادار نەکراوینەتەوە".
ئاماژەی بۆ ئەوەش کرد کە بەهۆی ئەوەی هیچ سکاڵایەک لەلایەن خانەوادە و کەسوکارەی گەنجەکەوە لە پۆلیسی سنوورەکە تۆمار نەکراوە تاوەکو ئێستا پۆلیس هیچ بەدواداچوونێکی بۆ بابەتەکە نەکردووە.
