ژ ئەگەرێ‌ تێكدانا ژینگەها باژێرێ‌ دهوكێ‌ ژلایێ‌ خودانێن موەلیدان ڤە، رێڤەبەریا ژینگەها دهوكێ‌ رابویە ب سزادانا دوو خودانێن موەلیدان ب كوژمێ‌ (5) ملیون دیناران و ئەڤ چەندە وەكە نیشانەك بو پاراستنا ژینگەهێ‌ هات بكار ئینان.

محەمەد تاهیر محەمەد سالح، رێڤەبەرێ‌ رێڤەبەریا ژینگەها پارێزگەها دهوكێ‌ د داخویانیەكێ‌ دا ئاشكرا كر : "ژ بەر كو تێكدانا ژینگەهێ‌ ئێكە ژ تاوانێن هەرە مەزن و ئەم وەك رێڤەبەریا ژینگەها پارێزگەها دهوكێ‌ ب هەمی شیان ڤە یێن كار دكەین ژ پێخەمەت پاراستنا ئاخ و ژینگەها خو لەورا تیم و كارمەندێن مە بو پاراستنا ژینگەها مە هەردەم د ئامادە باشی و بەرهەڤیان دانە".

هەمان رێڤەبەری ئەو چەندە ژی دوپات كر: "ژ بەر كو هندەك خودانێن موەلیدان ل دهوكێ‌ رابونە ب كرینا (گازا پیس) بو موەلیدێن خو و ئەو گازا ب كێر نە هاتی دبیتە ئەگەرێ‌ دروستبونا دوكێلەكا زور ل سەر دهوكێ‌ لەورا مە دەستپێكریە ب سزدانا وان كەسان ئەوێن ب ئەڤی كاری رادبن".

ناڤبری نەڤەشارت ژی: "د دەمێ‌ دوو رۆژێن بوری دا ئەم شیانە (2) خودانێن موەلیدان ل دهوكێ‌ ب كوژمێ‌(5) ملیون دیناران سزا بدەین و ئەم دێ‌ ل سەر ئەڤێ‌ هەوێ‌ د بەردەوام بین تا كو ژینگەها مە د ئاڤەدانیێ‌ دا بمینیت".










باسنيوز