پارێزگاری سلێمانی ڕای گەیاند ئەو کەسانەی تەقەیان لە بارەگای پارتی دیموکراتی کوردستان لە سلێمانی کردووە، پێویستە بدۆزرێنەوە و ڕووبەڕووی دادگا بکرێنەوە پاراستنی بارەگای حزبەکان ئەرکی ئێمەیە و نامانەوێ ئاشتیی کۆمەڵایەتی لەم شارەدا تێکبچێت.

ھەڤاڵ ئەبووبەکر، پارێزگری سلێمانی، ڕایگەیاند: "ئێمە ئیدانەی ھێرشرکردنە سەربارەگای پارتی دیموکراتی کوردستان و ھەر لایەنێکی دیکەی سیاسی دەکەین، چونکە بارەگای ھەموو حزبەکان بۆ ئێمە وەکوو یەک وایە و ئەرکی ئێمە پاراستنی ھەموو بارەگاکانە، بۆیە داوا لە ھاووڵاتیان دەکەم بە چاوێکی وردەوە مامەڵە بکەن، ھەروەھا ھێزەکانی ئێمە ھەموو کەس و بارەگا و ئۆرگانێکی جیاواز دەپارێزێت."

گوتیشی:" ھەر کەسێک دەستی لەو ڕووداوی تەقەکردنەدا ھەبێت، بێگومان دەدۆزرێتەوە و ڕووبەڕووی دادگا دەکرێتەوە، چونکە ئێمە نامانەوێ ئاشتیی کۆمەڵایەتی و سیاسی لەم شارەدا تێکبحێت".

پارێزگاری سلێمانی، جەختی لەوەش کردەوە، بەدواداچوون بۆ ڕووداوی تەقەکردنەکەی بارەگای پارتی دیموکراتی کوردستان دەکەین، ھەروەھا شەوی ڕابردوو ھێزەکانی پۆلیس و ئەسایش ڕۆڵی خۆیان بینیوە و لەسەر ھەوڵەکانی خۆیان بۆ دۆزینەوەی ئەو کەسانە بەردەوام دەبن".

ماوەیەکە لە سنووری پارێزگای سلێمانی و دەووروبەری تەقە لە بارەگاکانی پارتی دیموکراتی کوردستان دەکرێت، درەنگانی شەوی ھەینی ٣⁄٨⁄٢٠١٨ لە شاری سلێمانی، چەند کەسێکی نەناسراو دەستڕێژی گوللەیان لە بارەگای لیژنەی ناوچەی ڕۆژھەڵاتی پارتی دیموکراتی کوردستان لە سلێمانی کرد.











باسنیوز