رێڤه‌به‌رێ ئاڤا دهۆكێ راگه‌هاند، ئه‌و مه‌ترسیا كێمبوونا ئاڤێ یا ل سه‌ر باشوورێ عیراقێ هه‌ى ل سه‌ر هه‌رێما كوردستانێ نینه‌ و مه‌ ل هه‌رێمێ گه‌له‌ك ژێده‌رێن ئاڤێ هه‌نه‌ و ناگه‌هیته‌ وى ئاستى شه‌رێ ئاڤێ زیانێ ل هه‌رێما كوردستانێ بكه‌ت.

ئه‌ندازیار جه‌لال جه‌میل به‌رئاشى، رێڤه‌به‌رێ ئاڤا دهۆكێ راگه‌هاند، کو سالانه‌ ل هه‌ر سێ هه‌یڤێن هاڤینێ ئاریشێن كێم ئاڤیێ بۆ هاوولاتیان په‌یدادبن و ژ به‌ر ڤێ یه‌كێ ژى د وان سێ هه‌یڤان دا ئه‌م ب رێژا 10% ئاڤێ ژ سكرێ دهۆكێ دكێشین، به‌لێ ژێده‌رێن ئاڤێ ل پارێزگه‌ها دهۆكێ و ل هه‌رێما كوردستانێ دزۆرن و شه‌رێ ئاڤێ ل كوردستانێ په‌یدانابیت، به‌رۆڤاژى باشوورێ عیراقێ كو مه‌ترسیا كێمبوونا ئاڤێ ل سه‌ر وان هه‌یه‌.

ئاشكرا ژى كر، كو ژ به‌ر قه‌یرانا دارایى و شه‌رێ داعش، هه‌تا نها پرۆژه‌یێ دانانا پیڤه‌رێن ئاڤێ ب دووماهى نه‌هاتیه‌ و 75% ژ مالێن دهۆكێ پیڤه‌ر دانایه‌ و نه‌هاتیه‌ كاراكرن، نها كۆمپانیه‌كا لوبنانى هاتیه‌ ته‌رخانكرن بۆ تمامكرنا دانانا پیڤه‌رێن ئاڤێ و وه‌رگرتنا پارێ ئاڤێ ژ هاوولاتیان.










باسنيوز