پاش ڕووداونی پێکدادانی تانکەرێکی سووتەمەنی لەگەڵ پاسێکی موسافیرهەڵگر کە بووە هۆی کوژرانی 30 هاووڵاتی، بڕیارە سبەی پێنجشەممە لە گۆڕەپانی ئازادیی ئەو شارە گردبوونەوەیەکی ناڕەزایی ڕێک بخرێت.

بەپێی زانیارییە خۆجێیەکان، چالاکوانانی مەدەنی و کۆمەڵایەتیی شاری سنە بە بڵاوکردنەوەی ئاگاداری داوایان لە خەڵکی ئەو شارە کردووە، کاتژمێر شەشی ئێوارەی ئەمڕۆ سبەی پێنجشەممە 2018/7/12 بە کاتی ئێران لە گۆڕەپانی ئازادی (مەیان ئیقباڵ) کۆ ببنەوە و لە بەرانبەر خراپیی ڕەشێ ڕێگەوبان و کەمتەرخمیی حکوومەت بە هاتوچۆی ناستانداردی تانکەرەکانی سووتەمەنی بەناو شارەکان، ناڕەزایی دەرببڕن.

لە ڕووداوی ئاگرکەوتنەوە و پێکدادانی نێوان تانکەرێکی هەڵگری سووتەمەنی و پاسێکی موسافیرهەڵگر 30 کەس سووتان.

ڕێگەوبانەکانی سنە و بەتایبەت ڕێگەی سنە بۆ مەریوان کە بە جادەی مەرگ ناسراوە، زۆر ناستاندارد و خراپن و ساڵانە جیا لە کوژرانی سەدان هاووڵاتی، هاتوچۆی تانکرەکانی سووتەمەنی لە باشووری کوردستان و گوزەریان بەناو شارەکانی مەریوان، سەوڵاو و سنە، هەتا ئێستا دەیان کارەساتی مرۆیی و ژینگەیی لێ کەوتووەتەوە و حکوومەتیش بۆ دۆزینەوەی ڕێگەچارەی ئەم مەترسییە کەمتەرخەمە.










باسنيوز