روودان نەجیب باڵایی، کە خەڵکی شاری دهۆکی لە لووتكەی گەنجانی UN وەك نوێنەری عێراقییەكان دیاری كرا.

لە لووتکەی UNی نێودەوڵەتی گەنجان، کە لە ڕۆژانی 4 تا 8ی ئەم مانگە لە بنکەی سەرەکیی نەتەوە یەکگرتووەکان لە شاری نیویۆركی ئەمریکا بەڕێوەچوو، تێیدا بە تێروتەسەلی باس لە مافەکانی مرۆڤ کرا و نوێنەرانی وڵاتانیش باسی مافی مرۆڤیان لە وڵاتەکانی خۆیان کرد، ھاوكات كچە كوردێك وەك نوێنەری عێراقییەكان لە نەتەوە یەكگرتووەكان دیاری كرا.

ڕوودان باڵایی، لە لێدوانێکدا بۆ کەناڵی (کوردستان24) ڕای گەیاندووە: "دڵخۆشم كە وەك كچە كوردێك بە نوێنەری عێراقییەكان لە نەتەوە یەكگرتووەكان دەست نیشان كرام".

گوتیشی: "لە وتارەكەمدا لە لووتكەی گەنجانی نەتەوە یەكگرتووەكان، زیاتر باسم لە گەلی کورد و بەتایبەتی کچ و ژنە ئێزدییەکان و ڕەوشی ئاوارە و پەنابەرەکانی کوردستان و رەوشی مافی مرۆڤ بەگشتی لە عێراق کرد".

روودان، لەدایکبووی 1995 و خەڵکی شاری دهۆکە و هەڵگری بڕوانامەی ماستەرە لە سیاسەتی نێودەوڵەتی و لە ساڵی 2014ەوە لەگەڵ بنەماڵەکەی لە ئەمریکا دەژین و پێشتریش لە وڵاتەکانی ئەڵمانیا و چیك ژیاوە.

15هەمین کۆنگرەی لووتکەی نێودەوڵەتیی گەنجان لە نەتەوە یەکگرتووەکان بە بەشداریی 163 گەنجی وڵاتانی جیهان لە نیویۆرك بەڕێوە چوو.










باسنيوز