سەبارەت بە هاتووچۆی ئۆتۆمۆبێلی بارهەڵگر لە رێگای هەولێر- كۆیە لەلایەن بەڕێوەبەرایەتی هاتووچۆوە بڕیارێك دەردرێت.



زاهیر محەمەد بەرێوەبەری هاتووچۆی كۆیە راگەیاند: "بۆ كەمكردنەوەی قەڕەباڵغی و جەنجاڵی سەر رێگای هەولێر- كۆیە بڕیارێك درا کە لە کاتژمێر٦ی سەرلەبەیانییەوە تاوەکو کاتژمێر ٨ی ئێوارە هاتووچۆ ئۆتۆمۆبێلی بارهەڵگر لەو ڕێگا سەرەکییە قەدەغە بکرێت".



روونیشیکردەوە کە بڕیارەكە بە هاوبەشی لەلایەن کارگێڕیی شارەکانی كۆیە و هەولێرەوە دراوە و لە رۆژی یەكشەممە(٨-٧-٢٠١٨)ەوە دەچێتە باری جێبەجێكردنەوە.



بە پێی ئامارەکان لە ماوەی 6 مانگی رابردوودا لە رێگای هەولێر- كۆیە 100 رووداوی هاتووچۆ ڕوویانداوە و 10کەسیش بەوهۆیەوە گیانیان لە دەستداوە.



داخستنی رێگای نێوان هەولێر- كەركووك، لە دوای ڕووداوەكانی 16ی ئۆكتۆبەر، بووەتە هۆی درووستبوونی لۆدێكی زۆر لەسەر رێگای نێوان هەولێر - كۆیە و بەهۆی خراپیی رێگاکەوە ڕۆژانە ڕووداوی هاتووچۆی دڵتەزێن لەو ڕێگایە ڕوو دەدەن.
bas news-