ئەمڕۆ پەرلەمانی عێراق كۆ دەبێتەوە و بڕیارە دەنگ لەسەر هەمواركردنی چوارەمی یاسای هەڵبژاردنی پەرلەمان بدات، كە بەردەوامبوونی كاری پەرلەمان و دەنگدانه لەسەر هەژماركردن و جیاكردنەوەی دەستیی سەرجەم سندووقەكانی دەنگدان، پەرلەمانتارێكی فراكسیۆنی پارتییش دەڵێ، وەكو فراكسیۆنی پارتی، بەشداری لە دانیشتنی ئەمڕۆی پەرلەمان نابن، چونكە هەر درێژكردنەوەیەك پێچەوانەی دەستوورە.

پەرلەمانی عێراق، خوێندنەوەی دووەمی بۆ پڕۆژەیاسای درێژكردنەوەی تەمەنی پەرلەمان كردووە و بڕیارە ئەمڕۆ پەسەند بكرێت، دادگای فیدراڵییش لە نوێترین بڕیاری خۆیدا لەبارەی ئەو هەوڵەی پەرلەمانەوە، باسی لەوە كردووە كە درێژكردنەوەی ماوەی پەرلەمان، نایاسایی و نادەستوورییە.

نەجیبە نەجیب، ئەندامی ئەنجوومەنی نوێنەران لە فراكسیۆنی پارتی، بۆ ماڵپەڕی فەرمیی پارتی دیموكراتی كوردستان دەڵێ: "پەرلەمانی عێراق لەبارەی هەمواركردنی چوارەمی یاسای هەڵبژاردنی پەرلەمان كۆ دەبێتەوە و بڕیارە دەنگ لەسەر درێژكردنەوەی كاری پەرلەمان بدات".

نەجیب گوتیشی: "ئێمە وەكو فراكسیۆنی پارتی، بەشداری لە دانیشتنی ئەمڕۆی پەرلەماندا ناكەین، كە تەرخان كراوە بۆ درێژكردنەوەی ماوەی پەرلەمان، چونكە هەر درێژكردنەوه‌یه‌ك پێچەوانەی دەستوورە، كە 80%ی خەڵكی عێراق دەنگیان بۆ داوە".

ئەو پەرلەمانتارە دەشڵێ: "ئەو كارەی پەرلەمان دەیكات، كاری ئەو پەرلەمانتارانەیە كە سەرنەكەوتوونە، دەیانەوێت لە بەرژەوەندیی خۆیاندا بڕیار دەربكەن، كە مەرامێكی تایبەتی خۆیان هەیە، هەر لەبەر ئەوەیە ئێمە بەشدار نابین و بە درێژكردنەوەیش ڕازی نابین".

kdp-