جیالەوەی حكوومەتی عێراق نەیتوانیوە ئەمنییەتی رێگای وشكانیی نێوان شارەكان دابین بكات، كەچی بوونی بازگەی حەشدی شەعبی لەسەر رێگا سەرەكییەكان، مەترسییەكی دیكەیە بۆ ئەوەی هاووڵاتیان نەتوانن رێگای وشكانی بەكار بهێنن، بۆیە بە ناچاری پەنا دەبەنە بەر رێگای ئاسمانی. پەرلەمانتارێكیش، دەڵێت: "مەترسیی زۆر لەسەر رێگای كەركووك-هەولێر هەیە".

هەرێمی كوردستان لە لایەن خۆیەوە بڕیاری كردنەوەی رێگای كەركووك-هەولێری داوە، لە هەمان كاتدا ئاسانكاریی كردووە تا رێگای تەلسقۆف-مووسڵ بكرێتەوە، بەڵام هیچ یەكێك لەو رێگایانە نەكراونەتەوە، ئەوەش بە هۆی ترسی بازگەكانی حەشدی شەعبی و كوشتن و رفاندنی خەڵك لە رێگا سەرەكییەكانی نێوان عێراق و هەرێمی كوردستان، كە ئەو رێگایانە لە ژێر كۆنترۆڵی حكوومەتی عێراقدان و مەترسییان لەسەرە.

هاوكات پەرلەمانتار و بازرگانەكان بە هۆی مەترسیی رێگاكانەوە هێڵی ئاسمانی بەكار دەهێنن، گەشتیارانی بیانییش لە ترسی حەشدی شەعبی ئاگادار دەكرێنەوە، (كەمال یەڵدا)، جێگری سەرۆكی لیژنەی خزمەتگوزاری و گواستنەوە لە پەرلەمانی كوردستان، بۆ ماڵپەری فەرمی پارتی دیموكراتی كوردستان، گوتی: "ماوەی دوو ساڵە، رێگای وشكانیی (هەولێر-كەركووك و تەلسقۆف- مووسڵ) داخراوە و خەڵكی ئەو ناوچانە 30%ـیان گەڕاونەتەوە و ئێستایش ناتوانن هاتوچۆ بكەن، بە تایبەت هەبوونی بازگەی حەشدی شەعبی، ترسی لای خەڵك دروست كردووە، پێشتر لە بازگەكان سوكایەتی بە ئافرەت و كچی مەسیحی كراوە، بەشێكیان گوشاریان بۆ هێنراوە، بۆیە ناوێرن بە رێگای تەلسقۆفەوە بچنەوە مووسڵ و ئەو رێگایەش گیراوە".

یەڵدا ئەوەشی خستە روو: "دەسەڵاتی بەغدا لە رووی ئەمنییەوە هیچ ئامادەكارییەكی نەكردووە، تا ئەو رێگایانە نەبنە مەترسی و هەوڵی كردنەوەیشیان نەدراوە، بۆ نموونە رێگای هەولێر-كەركووك لەلایەن هەرێمی كوردستانەوە بڕیاری كردنەوەی بۆ دەرچووە، بەڵام بەغدا لەلایەن خۆیەوە ئەو ئامادەكارییەی نەكردووە، نە شەقامەكەی نۆژەن كردووەتەوە و نە توانیویەتی ئەمنییەنی بۆ دابین بكات، ئێستایش داعش لە حەمرینەوە گوشاری زۆری هێناوە و ئەو رێگایە بووەتە مەترسی بۆ هاتوچۆ".

دەشڵێت: "ژمارەیەكی زۆری تاوان و كوشتن و رفاندن لە رێگای كەركووك-هەولێر روویان داوە و، دەبێت دەسەڵاتی بەغدا لەو بارەیەوە وەڵامی هەبێت".
kdp-