ئەنجومەنی سەرکردایەتیی سلێمانی - هەڵەبجەی پارتی دیموکراتیی کوردستان، هۆشداری بە خەڵک و لایەنە سیاسییەکانی سلێمانی دا، لە قۆستنەوەی داواکارییەکانی خەڵک لەلایەن بزووتنەوەی گۆڕانەوە.



بەپێی ڕاگەیاندراوێکی ئەنجومەنی سەرکردارەتیی سلێمانی - هەڵەبجەی پارتی دیموکراتیی کوردستان ، ئاماژە بەوە دراوە، ڕێپێوان و خۆپیشاندانی ھێمنانە، یەکێکە لە سیماکانی کۆمەڵگەی مەدەنی و یەکێکە لە

پرەنسیپەکانی دیموکراسیەت، لەم سۆنگەیەوە ئەنجومەنی سەرکردایەتیی سلیمانی –

ھەڵەبجەی پارتی دیموکراتیی کوردستان دەڵێت: “وەک چۆن ھەمیشە پشتگیریی تەواوی داوا ڕەواکانی فەرمانبەران و مامۆستایان بووین، ئێستاش داواکارین لە حکوومەتی ھەرێمی کوردستان، میکانیزمی گونجاو بۆ چارەسەری دۆخی ژیانی مووچەخۆران بگرێتەبەر و چاوێک بە ژیان و گوزەران و شایستە داراییەکانی مووچەخۆراندا بخشێنیتەوە“.



هەر لەو ڕاگەیاندراوەدا ئەنجومەنی سەرکردایەتیی سلێمانی - هەڵەبجەی پارتی ڕای گەیاندووە: ”خەڵکی خۆڕاگری شاری سلێمانی و لایەنە سیاسییەکان ئاگادار دەکەین کە بزووتنەوەی گۆڕان بە ناوی ناڕەزایەتیی خەڵک و لە ژێر دروشمی داواکارییە ڕەواکانی خەڵکدا، بە مەبەستی چنینەوەی مەرامی سیاسی، ئیدامە بە خۆپیشاندان دەدات، بۆ

بەرژەوەندیی سیاسی و حزبیی خۆی، دیارە ‌تەوزیفکردنی ئەجێندای سیاسیش لەناوەندی

داواکاریی ڕەوای خەڵکەوە، زیان بە داواکارییە ڕەواکانی خەڵک دەگەیەنیت و سیمای پێکەوە ژیانی ئاشتییانەش تێکدەدات و لێکەوتەی نێگەتیڤیش لەسەر کایەی سیاسیی شار بەجێ دەھێڵێت“.



لە کۆتاییشدا داوای لە دەزگا ئەمنییەکانی سلێمانی کردووە، هێمنیی شارەکە و سەلامەتیی هاووڵاتییان و خۆپیشاندەران بپارێزن.









باسنیوز