کادیرێکی پێشکەوتووی پارتی دیموکراتیی کوردستان لە چەمچەماڵ ئاشکرای کرد، بە چەکی (ئێم فۆڕ) تەقە لە بارەگاکەی پارتی کراوە و سکاڵای یاساییش تۆمار کراوە.

ئیسماعیل هەنارەیی، کادیری پێشکەوتووى لقی 19ی پارتى دیموکراتىی کوردستان، ڕایگەیاند: "دواى ڕووداوى تەقەکردن لە بارەگاى لقى 19ی پارتى لە شارۆچکەى چەمچەماڵ، ئێستا هێزەکانى ئاسایش و پۆلیس سەرقاڵى لێکۆڵێنەوەن بۆ ئاشکراکردنى ئەو کەسانەى تەقەیان لە بارەگاکە کرد”. گوتیشی: "سکاڵاى یاسایی لەسەر ئەو دەستە تۆمار کراوە کە تەقەى لە بارەگای لقى 19ی پارتى کردووە و ئێستاش لە لایەن دەزگا ئەمنییەکانەوە پەڕاوى لێکۆڵینەوە بۆ هۆکارى ڕووداوەکە کراوەتەوە”.

ئەو کادیرە پێشکەوتووەی پارتی ئەوەشی ئاشکرا کرد: “بەچەکى جۆى (M4) لە ناو ئۆتۆمبێلێکى نەناسراودا تەقە لە بارەگاى پارتى لە چەمچەماڵ کراوە و نزیکەى 18 فیشەک بەر بارەگاکە کەوتووە. لەگەڵ ئەوەشدا چوار قەوانى فیشکەکە بەجێ ماوە”.

دەربارەى هۆکارى ئەو تەقەکردنە، ئیسماعیل هەنارەیی گوتی: "دواى پەیامەکەى بارزانى، دەستێکى تێکدەر دەیەوێت ناکۆکیی لایەنە سیاسییەکان تەشەنە بکات، بێگومان هۆکارى تەقەکردنەکە پەیوەندى بەو دەستە تێکدەرەوە هەیە کە دەیەوێت ئارامیی هەرێمى کوردستان تێک بدات”.

کاتژمێر (9:50) خولەکی شەوى ڕابردوو، تەقە لە بارەگای لقى 19ـه‌ى چەمچەماڵی پارتی دیموکراتیی کوردستان کرا. ئەمە بۆ جارى چوارەمە تەقە لە هەمان بارەگاى پارتى دەکرێت.











باسنیوز