دوای ئه‌وه‌ی لەچەند ڕۆژی ڕابردوو به‌هۆی دابه‌زینی په‌ستانی غازی كۆمپانیای دانه‌غاز، ئاستی به‌رهه‌مهێنانی كاره‌با له‌ وێستگه‌كانی به‌رهه‌مهێنانی كاره‌با كه‌مبووه‌وە، به‌ڵام ئێستا به‌رهه‌مهێنانی كاره‌با به‌ره‌و ئاسایی بونه‌وه‌ ده‌ڕوات.

سیروان محه‌مه‌د، به‌ڕێوه‌به‌رى ڕاگه‌یاندنى كاره‌باى پارێزگاى سلێمانى ڕاى گه‌یاند: "شه‌وى ڕابردوو به‌رهه‌مهێنانی كاره‌با به‌هۆی دابه‌زینی په‌ستانی غازی كۆمپانیای (دانه‌غاز) بۆ (1688) مێگاوات دابه‌زی، به‌وه‌ش پشكی پارێزگاكان كه‌مبوونه‌وه‌، به‌ڵام دوای هه‌وڵه‌كانی كۆنترۆڵی كاره‌بای هه‌رێم و كۆمپانیای دانه‌غاز، په‌ستانی غاز و به‌رهه‌مهێنانی به‌ره‌و ئاسایی بونه‌وه‌ و به‌ره‌و باشبوون ده‌ڕوات".

به‌ڕێوه‌به‌رى ڕاگه‌یاندنى كاره‌باى پارێزگاى سلێمانى، ئه‌وه‌شی ڕوون كرده‌وه‌: "ئه‌و كاره‌بایه‌ی له‌ كوردستان به‌رهه‌م دێت 34% پشكی پارێزگای سلێمانییه‌ به‌ ئیداره‌ی گه‌رمیانیشه‌وه‌، له‌گه‌ڵ 42% بۆ هه‌ولێر و 24% بۆ پارێزگای دهۆكه‌، دوای ئه‌وه‌ی پشكی كۆمپانیا گه‌وره‌كانی چیمه‌نتۆ و ئاسنی لێ ده‌رده‌كرێت".

گوتیشی: "هاوكات له‌ چەند ڕۆژی ڕابردوودا به‌هۆی هاتنی شه‌پۆڵێكی سه‌رماوه‌ خواست له‌سه‌ر كاره‌با به‌شێوه‌یه‌كی زۆر زیادی كردووه‌، ئه‌وه‌ش بۆته‌ هۆی كه‌مبونه‌وه‌ی كاتژمێره‌كانی پێدانی كاره‌با".












باسنيوز