ئەندامێکی مەکتەبی سیاسیی یەکێتیی نیشتمانیی کوردستان ئاماژە بەوە دەکات، هەوڵەکانی بزووتنەوەی گۆڕان بۆ گەڕانەوەی سلێمانی بۆ ژێر دەستی بەغدا، سەرکەوتوو نابێت، چونکە “بەغداش ئامادە نییە سەودا و مامەڵەیەکی لەم شێوەیە بکات”.



لەبارەی پرۆژەکەی بزووتنەوەی گۆڕان، بۆ ئەوەی حکوومەتی عێراق ڕاستەوخۆ مامەڵە لەگەڵ پارێزگای سلێمانیدا بکات، جەعفەر شێخ مستەفا، ئەندامی مەکتەبی سیاسیی یەکێتیی نیشتمانیی کوردستان و یەکێک لە سەرکردە دیارەکانی ناوەندی بڕیاری یەکێتی، ڕاگەیاند: “ئەم جۆرە هەوڵانە، نیشانەی لەباربردنی ئەم دەسکەوتانەی هەرێمی کوردستانە و دووبارە ڕادەستکردنەوەی هەرێمی کوردستانە بە حکوومەتی عێراق”.



ڕوونیشی کردەوە: “هیچ کاتێک بەغدا ناچێتە ژێر باری ئەو داواکارییەوە، چونکە ناکرێت دەوڵەتێک بچێتە ژێر باری ئەوەی کە لەسەر حکوومەتێکی دیکە باز بدات و بێت مامەڵە لەگەڵ پارێزگایەک بکات، ئەگەر ئەوەش بکات، خۆ دەبێت دەستەی مامەڵەکار لەگەڵ بەغدا لایەنی حکوومەت بێت”.



شێخ جەعفەر دەڵێت: “خۆ ناکرێت لایەنێکی سیاسی خۆی بکاتە نوێنەری خەڵک، ئێ ئەو مامەڵەش لەگەڵ خەڵک ناکرێت، بۆیە ئەوەی داوا کراوە بۆ لەتکردنی کوردستانە و شەقکردنی ئیدارەی حکوومەتە".









باسنيوز