زانیارییەکان ئاماژە بەوە دەکەن کە لەگەڵ کشانەوەی لە حکوومەت و حکوومەتە خۆجێییەکان، بزووتنەوەی گۆڕان لە سەرۆکایەتیی پەرلەمانیش دەکشێتەوە. پەرلەمانتارێکیش داوا دەکات، “لایەنی سێیەم ئەو پۆستە وەربگرێت”.



ڕاگەیاندنی فەرمیی یەکێتیی بڵاویان کردەوە کە ئەمڕۆ شەممە (5\11\2016)، کۆبوونەوەی جڤاتی نیشتمانیی بزووتنەوەی گۆڕان بڕیار لەسەر کشانەوە لە حکوومەتی هەرێمی کوردستان و حکوومەتە خۆجێیەکان دەدات. هاوکات لەگەڵ ئەوانەشدا، بڕیاری کشانەوە لە کۆمسیۆنی باڵای سەربەخۆی هەڵبژاردنەکان و سەرۆکایەتیی پەرلەمان دەدات.



لەمبارەیەشەوە مونا قەهوەچی، سەرۆکی فراکسیۆنی پێشکەوتووی تورکمان لە پەرلەمانی کوردستان، ڕاگەیاند: ئەگەر فراکسیۆنی گۆڕان بڕیاری کشانەوە لە سەرۆکایەتیی پەرلەمان بدات، بێگومان ڕێککەوتن دەکرێت و سەرۆکی نوێ بۆ پەرلەمان دیاری دەکرێت”.

ئەوەشی ڕوون کردەوە: “بە سکرتێر و سەرۆک و جێگرەوە، ئەگەر دەستەی سەرۆکایەتیی نوێ دیاری بکرێت، ئەوە پەرلەمان کارادەبێتەوە".

قەهوەچی باسیشی لەوە کرد: “ئەگەر لایەنی دووەم کە گۆڕانە نەتوانێت پۆستی سەرۆکی پەرلەمان وەربگرێت، یان بەڕێوەی ببات، دەبێت لایەنی سێیەم کە یەکێتییە، ئەو پۆستە وەربگرێت".








باسنيوز