سەرۆک بارزانی لە پێشوازی وەزیری بەرگری تورکیا، پێزانین و خۆشبینیی خۆیی نیشاندا بەو هەنگاوانەی لە توركیا بۆ چارەكردنی كێشەكان و پڕۆسەی چارەسەری ئاشتی لە ئارادایە و ئامادەیی هەرێمی كوردستانیشی نیشاندا كە لە هەموو قۆناغەكانی ئەم پڕۆسەیە یارمەتیدەر بێت بۆ نەهێشتنی گرفتەكان..لەبەرانبەردا وەزیری بەرگری تورکیا رایگەیاند کە وڵاتەکەی لە شەڕی تیرۆریستانی داعش پاڵپشتی هەرێمی كوردستان دەبێت.

ئەمڕۆ پێنجشەممە 5ـی 3ـی 2015 لە شاری هەولێر سەرۆكی هەرێمی كوردستان (مەسعود بارزانی) پێشوازی لە ئیسمەت یەڵماز وەزیری بەرگریی توركیا و شاندێكی یاوەری كرد كە لە فاروق قایماغچی باڵیۆزی توركیا لە عێراق و مەحمەد عاكیف كونسوڵی توركیا لەهەولێر و ژمارەیەك بەرپرس و ڕاوێژكاری وەزارەتی بەرگریی توركیا پێكهاتبوو.
لە دیدارەكەدا وەزیری بەرگریی توركیا سوپاسی (سەرۆك بارزانیی) كرد بۆ ڕەخساندنی دیدارەكە و ستاییشی میواندۆستیی گەلی كوردستانی كرد و پێزانینیشی هەبوو بۆ ڕەوشی ئاوەدانكردنەوەی هەرێمی كوردستان و هەروەها بۆ خەبات و قوربانیدانی گەلی كوردستان لە قۆناغە جیاجیاكاندا و هیوای پێشكەوتنی زیاتری بۆ خەڵكی كوردستان خواست.

وەزیری بەرگریی توركیا لە درێژەی قسەكانیدا باسی لەپێویستیی پێكەوەژیانی گەلانی ناوچەكە كرد كە بەحوكمی دراوسێتی و مێژوو و جیۆگرافیای هاوبەش هیچ چارەیەكیان نییە جگە لەوەی بەیەكەوە بن و لەدابینكردنی ئاساییش و خۆشگوزەرانی و پێشكەوتن هاوكاری یەكتری بن.
ئەوەیشی خستەڕوو كە ستراتیژیی وڵاتەكەی بەردەوامیی پەیوەندی و هاوكاریی نێوان هەردوولایە لە بواری ئابووری و وزە و ئەوەیش پێویستی بە دابینكردن و پاراستنی ئاساییشی هەردوولا هەیە.
وەزیری بەرگریی توركیا جەختی لەوەیش كردەوە كە وڵاتەكەی لە شەڕی تیرۆریستانی داعش پاڵپشتی هەرێمی كوردستان دەبێت و لە مەشقپێكردنی پێشمەرگە و گەیاندنی هاوكاریی مرۆڤی بەردەوام دەبێت.
لە بەرانبەردا سەرۆك بارزانی بەخێرهاتنی شاندی میوانی كرد و هێمای بەوەدا كە لەنێوان هەردو لادا زۆر بوار هەیە كە دەكرێ بە هەماهەنگی و هاوكاری كاری لەسەر بكرێت و پێشەڤەچوون و ئاشتی و پێكەوەژیان بەدیبهێندرێت.
سەرۆك بارزانی جەختیشی لەوە كردەوە كە پێویستە گەلانی ناوچەكە بە برایەتی لەگەڵ یەكتردا بژیین و هیچ جۆرە ناحەزییەك لەنێوانیاندا نەمێنێت و دەرفەتی زۆر گەورە هەیە بۆ یارمەتیدانی یەكتر و بە بێ یەكترقبوڵكردن و برایەتیش، پێشكەوتنی ناوچەكە ناهێتە دی.
سەرۆك بارزانی پێزانین و خۆشبینیی خۆیشی نیشاندا بەو هەنگاوانەی لە توركیا بۆ چارەكردنی كێشەكان و پڕۆسەی چارەسەری ئاشتی لە ئارادایە و ئامادەیی هەرێمی كوردستانیشی نیشاندا كە لە هەموو قۆناغەكانی ئەم پڕۆسەیە یارمەتیدەر بێت بۆ نەهێشتنی گرفتەكان.
لەبارەی هەڕەشەی تیرۆریش (سەرۆك بارزانی) ئاماژەی بەوەدا كە تیرۆر دوژمنی هاوبەشی هەموو لایەك و دژی ئازادیخوازی و مرۆڤایەتییە و بۆ ئەوەی لە تیرۆر ڕزگار ببین دەبێ گشت لایەك هەوڵی خۆی بدات.
هەروەها تیرۆریستانی داعشیش لە بەرەكاندا لەسەر دەستی پێشمەرگە تووشی شكست هاتووە و ڕاستە كە قوربانیی زۆرماندا بەڵام جێگەی سەربەرزییە كە تیرۆریستانی داعش لەسەر دەستی پێشمەرگە شكاون.
هەر لەم كۆبوونەوەیەدا بارودۆخی سیاسی و ئەمنیی ناوچەكە و هەماهەنگی و هاوكاریی لایەنەكان بۆ تێكشكاندنی تیرۆر و ئازادكردنی ناوچەكان لەدەستی تیرۆریستان و پەیوەندیی نێوان هەرێمی كوردستان و توركیا قسەی لەبارەیەوە كرا.
جێگەی ئاماژەپێدانە لەم كۆبوونەوەیەدا مستەفا سەید قادر وەزیری پێشمەرگە و فواد حوسێن سەرۆكی دیوانی سەرۆكایەتی و شێخ جەعفەر شێخ مستەفا و فەلاح مستەفا بەرپرسی فەرمانگەی پەیوەندییەكان و ئەنوەر حاجی عوسمان بریكاری وەزارەتی پێشمەرگە و فەریق شێروان عەبدوڵڕەحمان و فەریق جەبار یاوەر ئەندامانی فەرماندەی گشتیی هێزەكانی پاراستنی هەرێم ئامادە بوون.