لە راپۆرتێكی گۆڤاری گوڵاندا بابە شێخ خرتۆ مەرجەعی ئاینی گشتی ئێزیدی دەڵێ: (ئێمە وەكو كوردی ئێزدی بەو پلان و هەوڵانەی سەرۆك بارزانی سەرۆكی كوردستان و هێزی پێشمەرگەی كوردستان زۆر دڵخۆشین كە شنگال و سنوورەكەی لە دەست تیرۆرستانی داعش رزگار كرد، هەرگیز چاوەڕوانی ئەوەمان نەدەكرد بەم نزیكانە شوێنەكانی ئێزیدی ئازاد بكرێت و لەدەست چەكدارانی داعش پاكبكرێتەوە، بەتایبەتی شنگال كە بۆ ئێزدیەكان پیرۆزەو شوێنی دێرینی مێژووییمانە، جەنابی مسعود بارزانی سەرۆكی كوردستان سۆزيدابوو كە شەخسی خۆی بەشداری لە رزگاركردنی شنگال دەكات و دەچێتە سەر چیای شنگال، ئەوەبوو بە پلانێكی تۆكمەو وردو زانستی بە كەمترین قوربانی بە پاڵپشتی تەنیا هێزی پێشمەرگە شنگال و زۆربەی سنوورەكە پاككرایەوە، بەڵێنەكەی بۆ ئێزیدیان جێبەجێ كردو چووە سەر چیای شنگال و سەردانی مەزاری شەرەفەدینیشی كرد.

شێخ خرتۆ گوتی: مێژوو ئەم سەركەوتنە بۆ سەركردەیەكی سەركەوتوو و پێشمەرگە ئازاكانی دەنووسێتەوە، هەر ئەمەشم لە سەرۆكی كوردستان چاوەڕوان دەكرد، من وەكو مەرجەعی گشتیی ئێزیدی رێزو خۆشەویستیم بۆ سەرۆكی كوردستان و هێزی پێشمەرگە هەیە، ئەمڕۆ هەموو ئێزیدیەك پێشمەرگەیەو رێزی بۆ فیداكاریی و شەهیدبوونی رۆڵەكانی كوردستان هەیە، سەرۆكی كوردستان هەموو كات خۆی بە پێشمەرگە زانیوە بۆ پاراستنی خاك و خەڵكی كوردستان تەنانەت پێشمەرگایەتی لەلای ئەو لەهەموو پۆست و پلەو پایەیەك پیرۆزتر بووە. داواكاریشم لەجەنابی بارزانی بۆ ئەوەی ئەم ناوچەیە جارێكی تر كارەساتی وا دڵتەزێن بەخۆیەوە نەبینێت و دوژمنان چاوی تەماعی تێنەبڕن هێزێكی پێشمەرگەی بەتواناو پڕ چەك لەسنوورەكە جێگیر بكات و سەنگەرو سنوورەكان تووند بكرێت، هەروەها داوا لەسەرۆكی حكومەتی هەرێمی كوردستان دەكەم قەرەبووی ئەو زیانە زۆرەی ئێزیدی و ناوچەكەیان بكرێتەوه.

شایانی باسە بابە گوتی: ، پێمان خۆشە لەدوای رزگاركردنی تەواوی سنوورەكە و گەڕانەوەی خەڵكەكەی شنگال و تەواوی دەڤەری ئێزدیەكان ئاوەدان بكرێتەوە و ئیدارەیەكی سەربەخۆی سەر بەكوردستان بۆ شنگال دانرێت. لەم كارەساتەدا بۆمان دەركەوت كە خەڵكی كوردستان و سەرۆك و پێشمەرگەكانیان چەند دڵسۆزی ئێزدین، كە سەڕەرای نەهامەتی و بێ توانایی و خراپی بژێوی ژیانیان توانیان پێشوازی لەو ژمارە زۆرەی ئاوارە بكەن، ئەم هەڵوێستەش بە بەرزو گرنگ دەزانین).


بۆ خوێندنەوەی ئەم بابەتە لە گۆڤاری گوڵان ژمارە (1007)