فەرماندەیەكی پێشمەرگە بە تۆڕی میدیایی رووداوی راگەیاند، ئەمڕۆ شەممە 27ـی کانوونی یەکەمی 2014، داعش لەنێو شنگال دوو هێرشی كردە سەر هێزەكانی پیشمەرگە و لە هەردوو هێرشدا تێكشكێنرا.

عەمید بەهرام یاسین، فەرماندەی لیوای حەوتی هێزی پێشمەرگە لە شنگال، رایگەیاند، كە ئەمڕۆ داعش بە چەكی قورس و ئۆتۆمبێلی بۆمبڕێژكراو هێرشێكی كردە سەر بارەگاكانی پێشمەرگە لە گەڕەكی برایەتی لە نێو شنگال و ئۆتۆمبێلەكەیان لە نزیك بارەگای پێشمەرگە تەقاندەوە و بە هۆیەوە پێشمەرگەیەك شەهید بوو، دوو پێشمەرگەش بریندار بوون، بەڵام لەلایەن پێشمەرگەوە وەڵامدراونەتەوەو هێرشەکە تێكشكێنرا.

ئەو فەرماندەیە هەروەها گوتی، دوای ئەوە جارێكی دیكە هێرشیان كردەوە سەر پێشمەرگە و لەلایەن هێزی پێشمەرگەوە ئەو هێرشەش تێكشكێنرا و ژمارەیەكی زۆر چەكداریان لێ كوژراوە، بەبێ ئەوەی ئاماژە بە ژمارەی كوژراوەكان بكات.

رۆژی 17ـی کانوونی یەکەمی 2014 ئۆپەراسیۆنی كۆنتڕۆڵكردنەوەی ناوچەی شنگال دەستیپێكرد و پێشمەرگە ناوچەیەكی زۆری كۆنتڕۆڵكردەوەو گەیشتە نێو شنگال.









رووداو