ئێواره‌ى ئه‌مڕۆ خاتوو فێدریكا مۆگیرینى به‌رپرسى سیاسه‌تى ده‌ره‌وه‌ى یه‌كێتیى ئه‌ورووپا گه‌یشته‌ هه‌ولێر ، مۆگیرینى به‌ گه‌یشتنى له‌ فڕۆكه‌خانه‌ى نێوده‌وڵه‌تیى هه‌ولێر له‌ لایه‌ن نێچیرڤان بارزانى سه‌رۆك وه‌زیرانى هه‌رێمى كوردستانه‌وه‌ پێشوازیى لێكرا . پاشان دیدارێك له‌ نێوان سه‌رۆك وه‌زیرانى هه‌رێمى كوردستان و به‌رپرسى سیاسه‌تى ده‌ره‌وه‌ى یه‌كێتیى ئه‌وورووپا به‌ڕێوه‌چوو .

بڕیاریشه‌ سبه‌ینێ سێشه‌ممه‌ به‌ڕێز مه‌سعوود بارزانى سه‌رۆكى هه‌رێمى كوردستان پێشوازیى له‌ خاتوو فێدریكا مۆگیرینى بكات و هه‌ردوولا كۆببنه‌وه‌ .

به‌ پێى زانیارییه‌كانى كوردستان تیڤى، سه‌ردانى به‌رپرسى سیاسه‌تى ده‌ره‌وه‌ى یه‌كێتیى ئه‌ورووپا بۆ هه‌رێمى كوردستان تاوتوێكردنى بارودۆخى كوردستان و عێراق و شه‌ڕى دژى داعش و سه‌ركه‌وتنه‌كانى پێشمه‌رگه‌ى كوردستان به‌سه‌ر تیرۆریستان و هه‌روه‌ها پته‌وكردنى په‌یوه‌ندى و هه‌ماهه‌نگی نێوان هه‌رێمى كوردستان و ئه‌ورووپا له‌ خۆ ده‌گرێت .

جێی ئاماژەیە فێدریكا مۆگرینی لە ساڵی 1973 لەدایك بووە و یەكێك لە سیاسەتمەدارە گەورەكانی ئەورووپایە و، لە پشكی دەوڵەتی ئیتاڵیا لە یەكیەتیی ئەورووپا پۆستی رێکخەری باڵای سیاسەتی دەرەوە و ئاساییشی ئەو یەکیەتییەی وەرگرتووە.