لە دوو رووداوی جیاوازدا لە شاری هەولێر دوو کەس دەكوژرێن کە یەکێکیان بەدەست براکەی بووە.

رائید كاروان عەبدولكەریم، بەڕێوەبەری راگەیاندنی پۆلیسی هەولێر، لە پەیجی تایبەتی لە تۆڕی كۆمەڵایەتى فەیسبووك بڵاویكردووەتەوە،" كاژێر 05:30 ی ئێوارەی ئەمڕۆ یەكشەممە 21/12/2014، لەگەڕەکی بەهـاری نوێی شاری هەولێر، لە ئاکامی یاریکردن بەچەکی جۆری ( تاپڕ ) لەنێوان دوو هاوڕێ یەكێكیان كوژراوە".

كاروان عەبدولكەریم نووسیویەتی،" چەكەكە بە دەستی (ص.س.م) بووە، گوللەیەكی لەدەستی دەرچووە و بە دەمی هاوڕێكەی (ر.ف) ی تەمەن 25 ساڵ كەوتووە، دەستبەجێش گیانی لەدەست داوە". دۆسیەی لێكۆڵینەوە بۆ رووداوەكە كراوەتەوە و (ص.س.م) لەلایەن پۆلیس دەستگیركراوە.

وەك بەڕێوەبەری راگەیاندنی پۆلیسی هەولێر بڵاویكردووەتەوە، كاژێر 08:00 ی ئەمشەو لە ناحیەی قوشتەپە، له کاتی یاریکردن بەچەکی جۆری کلاشینکۆف لەماڵەوە لەلایان دوو مێردمنداڵی تەمەن 10 ساڵ و 12 ساڵەوە، یەكێكیان گوللەیەكی لەدەست دەرچووە و بە سكی براكەی (ا.د)ی تەمەن 12 ساڵ كەوتووە، دەستبەجێش گیانی لەدەست داوە.