بەناوی خودای بەخشندە و میهرەبان

هاووڵاتیانی ئازیزی هەرێمی كوردستان و ناوچە كوردستانییەكانی دەرەوەی ئیدارەی هەرێم

سوپاس بۆ خودا و ئێوەی ئازیز جارێكی دی ئەو دەرفەتە هاتە ئاراوە كە خەڵكی خۆشەویستمان لەڕێی سندوقەكانی دەنگدانەوە بڕیار لە ژیانی سیاسی و بەڕێوەبردنی خۆیان بدەن. لەم قۆناغەدا بەشداریكردنتان لە هەڵبژاردنی ئەنجوومەنی نوێنەرانی عێراق گرنگییەكی تایبەت و مێژوویی هەیە و سەنگی سیاسیی كورد لە عێراق بەهێزتر دەكات. بۆ بەرگریكردن لە مافەكانی گەلی كورد و ڕووبەڕووبوونەوەی ناحەزانی گەلی كورد لە پڕۆسەی سیاسیی عێراقدا داواتان لێ دەكەم بە جۆش و خرۆشەوە بەشدار بن و نوێنەرەكانتان لە ئەنجوومەنی نوێنەرانی عێراق هەڵبژێرن.

خۆشەویستان

هەڵبژاردنی ئەنجوومەنی پارێزگاكانی هەرێمی كوردستان كاریگەریی ڕاستەوخۆی لەسەر باشتربوونی بەڕێوەبردنی شار و شارۆچكەكان و خزمەتگوزاریی بۆ هاووڵاتیان و هەروەها قووڵتربوونی كولتووری دیموكراسی لەنێو كۆمەڵگەدا دەبێت. داواتان لێ دەكەم بە فراوانترین شێوە بەشداری ئەم هەڵبژاردنە بن و دەنگ بەو كەسانە بدەن كە دەتوانن بە باشترین شێوە خزمەتی وڵاتەكەمان بكەن.

بە پێویستی دەزانم داوا لە لایە پەیوەندیدارەكان و دەزگەكانی ئاساییش و كۆمیسیۆنی هەڵبژاردن و گشت هاووڵاتییە بەڕێزەكان بكەم كە هەوڵ بدەن هەڵبژاردنەكانی ڕۆژی 30 نیسان بە باشترین شێوە بەڕێوە بچێت و وێنەی شارستانی و سەردەمییانەی كوردستان پێشانی جیهان بدەن.

مسعود بارزانی

سەرۆكی هەرێمی كوردستان

27ـی 4ـی 2014