نێچیرڤان بارزانی: بەسەربەرزی لەم كێشانەی ئێستا دەرباز دەبین
نێچیرڤان بارزانی رایدەگەیەنێ، هەڕەشەكانی بەغدا ژیانی رۆژانەی هاووڵاتیانی راگرتووە و ئێمە چاوەڕێ نەبووین بەناوی دیموكراتییەوە سزای هاونیشتمانیان بدرێت.
نێچیرڤان بارزانی، جێگری سەرۆكی پارتی دیموكراتی كوردستان لە میانی بەڕێوەچوونی ئاهەنگێكی جەماوەری حیزبەكەی لە شاری هەولێر رایگەیاند، سەركردایەتی سیاسی كورد پلانی هەیە و دەبێ نوێنەرایەتی هەرێمی كوردستان لە بەغدا بەهێز بكەین.
نێچیرڤان بارزانی باسی لە كێشەكانی نێوان هەولێر و بەغدا كرد گوتی "هەڕەشەكانی بەغدا ژیانی رۆژانەی هاووڵاتیانی راگرتووە و ئێمە چاوەڕێ نەبووین بەناوی دیموكراتییەوە سزای هاونیشتمانیان بدرێت".
سەبارەت بە بڕینی بودجە و مووچەی هاونیشتمانیانیش، جێگری سەرۆكی پارتی دیموكراتی كوردستان جەختیكردەوە كە "چۆك دانانێین بۆ هیچ لایەنێك و بەسەربەرزی لە كێشەی مووچە دەرباز دەبین".
نێچیرڤان بارزانی دەڵێت "چاوەڕێ نەبووین دیموكراتی لە عێراق بكرێتە داردەستی لایەنێكی سیاسی لە بەغدا، بەڵام دەبێت بەردەوامبین بۆ گەیشتن بە مافی رەوای گەلەكەمان".
