ئەمڕۆ چوارشەممە، نێچیرڤان بارزانی، سەرۆک وەزیرانی هەرێمی کوردستان، بەمەبەستی پێکهێنانی کابینەی هەشتەمی حکوومەتی هەرێمی کوردستان، لەگەڵ لایەنەکانی ( تورکمانی، کلد و ئاشوری، زەحمەتکێشان)، کۆبۆوەوە و لە کۆنگرەیەکی رۆژنامەوانیشدا، گوتی: تەنازول لە مافی دەستوورییەکانی هەرێمی کوردستان لە عێراقی فیدراڵ، ناکەین.



لەو کۆنگرە رۆژنامەوانییەدا، سەرۆک وەزیران لە وەڵامێکی رۆژنامەوانان گوتی: ئامادەین بۆ دەسەلاتی ناوەندی شی بکەینەوە و روونی بکەینەوە کە مافی دەستوری خۆمانمان هەیە و تەنازول لە مافی رەوای خۆمان ناکەین.

لە بارەی پرسی نەوتەوە، نێچیرڤان بارزانی، گوتی: بە دوو قۆناغ ئێمە کەیسی نەوتمان بڕیوە، یەکەم بیسلەمێنین نەوتمان هەیە کە ئەوەمان سەلماند، دوەمیش هێنانی کۆمپانیاکانی بەرهەمهێنانی نەوت بوو کە ئەوەشمان تێپەڕاند.

هەروەها رایگەیاند: جاران حکوومەتی عێراق، منەتیان دەکرد کە نەوتی عێراق دەفرۆشن و لەو بەشە بودجەی کوردستان دابین دەکەن، بەلام ئەمرۆ ئێمە هاوبەشی راستەقینەی داهاتی عێراقین.

هەروەها گوتی: یاسای موازنەی بەغدا سزایە دژی هەرێمی کوردستان نەک یاسا و سیستمی فیدراڵی بەم شێویە نییە و نەبووە.



سەرۆک وەزیرانی هەرێمی کوردستان لە کۆتاییدا گوتی: ئێمە مومارەسەی مافێکی دەستوری هەرێمی کوردستان کە لە دەستووری عێراق پێمان دراوە، دەکەین و و دەمانهەوێ بە پراکتیک جێبەجێ بکرێت وئامادەشین لەگەڵ بەغدا دابنیشین و بە روونی هەموو شتەکان باس بکەین بۆ ئەوەی زیاتر لە پرسەکان تێگەیشتنیان هەبێت.