سەرۆکی هەرێمی کوردستان پێشوازی لە باڵیۆزی ژاپۆن لە عێراق کرد
لە میانی دیدارێکدا ماساتۆ تەکەواکا باڵیۆزی ژاپۆن لە عێراق سوپاسی بەڕێز مسعود بارزانی سەرۆکی هەرێمی کوردستانی کرد بۆ پێشوازیکردن، و ئاماژەی بەوە كرد كە، وڵاتەکەی ئارامی و سەقامگیری رەوشی ئەمنی هەرێمی کوردستانی بەلاوە گرنگە و جێگەی ستایشکردنە.
لە بەشێکی دیدارەکەدا باڵیۆزی ژاپۆن لە عێراق باسی لەوە کرد، كە لەرێگەی کەرتی تایبەتەوە شەراکەتێکی بەهێزی ئابووری هەیە لە نێوان ژاپۆن و هەرێمی کوردستان و هیوای خواست ئەم شەراکەتە بێتە هۆی پتەوکردنی پەیوەندییەکانی هەردوولا، چونکە ژاپۆن گرنگیەکی زۆر دەدات بە رەوشی ئاشتی و پێکەوەژیان لە هەرێمی کوردستان و لەسەر ئەم بنەمایەش دەیەوێ پەیوەندییەکانی پتەوتر بکات.
باڵیۆزی یابان لە عێراق مەبەستی سەردانەکەی بۆ هەرێمی کوردستان بۆ ئەوە گەڕاندەوە، کە هاتوون هاوکاری و کۆمەک ببەخشن بە ئاوارەکانی رۆژئاوای کوردستان و هاوکات سوپاسی هەرێمی کوردستانی لە هاوکاریکردنی ئاوارەکان کرد و گوتی: \"ئێوە ئەرکێکی قورستان جێبەجێکردووە بەرامبەر بەم ئاوارانە و ئێمەیش دەمانەوێ هاوکاریتان بکەین\"".
بەڕێز مسعود بارزانی سەرۆکی هەرێمی کوردستان وێڕای بەخێرهێنانی باڵیۆزی یابان لە عێراق، جەختی لەسەر پتەوکردنی پەیوەندییەکانی نێوان هەرێمی کوردستان و ژاپۆن کردەوە و ڕۆڵی وڵاتی ژاپۆنی لە گۆڕەپانی نێونەتەوەیی بە گرنگ وەسف كرد."
