پاش نیوه‌رۆی دوێنێ له‌ هه‌ولێر نێچیرڤان بارزانی جێگری سه‌رۆكی پارتی دیموكراتی كوردستان پێشوازیی له‌ جیراردۆ كه‌ره‌نتی باڵیۆزی ئیتالیا له‌ به‌غدا كرد كه‌ به‌ یاوه‌ریی سیمۆنی دیسانتی به‌رپرسی كونسولگه‌ری ئیتالیا له‌هه‌رێمی كوردستان سه‌ردانی كرد .

له‌دیدارێكدا وێڕای باسكردنی بارودۆخی هه‌رێمی كوردستان و عێراق به‌گشتی ، په‌یوه‌ندیه‌كانی نێوان هه‌رێمی كوردستان و ئیتالیاش تاوتوێ كران و ته‌ئكید له‌سه‌ر زیاتر پته‌وكردنی په‌یوه‌ندیه‌ دوو قۆلیه‌كان كرایه‌وه‌، به‌تایبه‌تی له‌بواری بازرگانی و ئابووری هه‌روه‌ها هاندانی كۆمپانیاكانی ئیتالیا بۆ كاری سه‌رمایه‌گوزاری له‌هه‌رێمی كوردستان و زیاتر سوودوه‌رگرتن له‌ شاره‌زا و پسپۆرانی ئیتالیا .

نێچیرڤان بارزانی وێرای دووپاتكردنه‌وه‌ی به‌هێزكردنی په‌یوه‌ندیه‌ دوو قۆلیه‌كان هاوكات پاڵپشتی بۆ ره‌خساندنی كه‌شی له‌بار و هه‌ماهه‌نگی نێوان هه‌ردوولا دووپات كرده‌وه‌.

هه‌روه‌ها پاڵپشتی خۆیشی ده‌ربڕی بۆ هه‌موو ئاسانكارییه‌ك سه‌رجه‌م كاره‌كانیان له‌ هه‌رێمی كوردستاندا .