جه‌بار یاوه‌ر وته‌بێژی وه‌زاره‌تی پێشمه‌رگه‌و ئه‌مینداری گشتی هێزه‌ چه‌كداره‌كانی حكومه‌تی هه‌رێم له‌لێدوانێكی تایبه‌تدا سه‌باره‌ت به‌پاراستنی ناوچه‌ سنورییه‌كانی هه‌رێمی كوردستان به‌ PUKmedia ی راگه‌یاند: ئێمه‌ وه‌كو حكومه‌تی هه‌رێمی كوردستان هه‌میشه‌ له‌هه‌وڵی ئارامی و پاراستنی ناوچه‌ سنورییه‌كانی هه‌رێمی كوردستان له‌گه‌ڵ وڵاتانی ده‌روبه‌رمانداین و خۆشبه‌ختانه‌ش ئێستا حكومه‌تی هه‌رێم په‌یوه‌ندی باشی دبلۆماسی و بازرگانی له‌گه‌ڵ وڵاتانی ده‌وروبه‌ردا هه‌یه‌، بۆیه‌ هه‌وڵده‌ده‌ین كه‌ رێگه‌ نه‌ده‌ین سنوره‌كانی هه‌رێم ببنه‌ شوێنی شه‌ڕكردن و به‌ره‌كانی جه‌نگ، بۆ ئه‌م مه‌به‌سته‌ش ئێمه‌ هه‌موو هه‌وڵه‌كانی خۆمان بۆ چاره‌سه‌ر كردن و هێور كردنه‌وه‌ی بارودۆخی ئه‌و ناوچانه‌ ده‌ده‌ین، ئه‌م راستیه‌ش زیاتر له‌سه‌ردانی سه‌رۆكی هه‌رێم و وه‌فده‌ باڵاكانی حكومه‌تی هه‌رێم بۆ وڵاتی توركیا ره‌نگی داوه‌ته‌وه‌ .
وتیشی: به‌پێی ناوه‌ڕۆكی رێككه‌وتننامه‌ نێو ده‌وڵه‌تییه‌كان ده‌بینین له‌ساڵی 2007 وه‌ هه‌ندێك جموجوڵی سه‌ربازیی وه‌كو تۆپبارانكردن و بۆردومانكردنی فڕۆكه‌ جه‌نگییه‌كان له‌سه‌ر ناوچه‌ سنورییه‌كانی هه‌رێمی كوردستان هه‌ن كه‌ ئه‌مانه‌ش ده‌چنه‌ چوارچێوه‌ی به‌زاندنی سنوری نێوده‌وڵه‌تییه‌وه‌، به‌ڵام وه‌كو هاتنی هێزی سه‌ربازی توركیاو ئێران بۆ سه‌ر خاكی هه‌رێمی كوردستان، تاكو ئێستا هێزه‌ سه‌ربازییه‌كانی ئه‌م 2 وڵاته‌ سنوری هه‌رێمی كوردستانیان نه‌به‌زاندووه‌و هیچ بنكه‌و باره‌گایه‌كی خۆیان له‌و ناوچانه‌ جێگیر نه‌كردووه‌ .
راشیگه‌یاند: به‌مه‌به‌ستی زیاتر دڵنیابوون له‌سنوربه‌زاندنی خاكی هه‌رێمی كوردستان بڕیاروایه‌ به‌منزیكانه‌ به‌هه‌ماهه‌نگی له‌گه‌ڵ ئێمه‌ تیمێكی سه‌ربازی تایبه‌تی حكومه‌تی عیراقی روپێوێكی ورد له‌ناوچه‌ سنورییه‌كانی هه‌رێمی كوردستان ئه‌نجامبدات بۆئه‌وه‌ی له‌و روپێوه‌دا روون و ئاشكرا بكرێت كه‌ئایا تاكو ئێستا ناوچه‌ سنورییه‌كانی هه‌رێم به‌زێندراون یاخود نا.