دوای دەستکەوتنی زانیاری ورد هێزەکانی نوسینگەی لێکۆڵینەوەی تاوانە گەورەکانی خانەقین بە هاوکاری هێزێکی تایبەتی ئاسمانی ئەمەریکا توانیان لە شارەدێی جەلەولا کەسێک دەستگیر بکەن کەبەپێی مادەی 4 ی تیرۆر لەلایەن دادگاوە داواکراو بوو.
لەمبارەیەوە فەرهاد رەفعەت، بەرپرسی نووسینگەی لێکۆڵینەوەی تاوانە گەورەکان بە ئاژانسی هەواڵی پەیامنێری راگەیاند؛ شەوی 20/21 ئەیلول / سەپتەمبەر بە هاوکاری هێزیکی ئاسمانی تایبەتی ئەمەریکا توانیمان لە گەڕەکێکی شارەدێی جەلەولا تیرۆستێک دەستگیر بکەین کەبە پێی مادەی 4 ی تیرۆر لەلایەن دادگاوە داواکراو بوو؛

وتیشی: ئەو تیرۆستە لەبەردەم دادوەری لێکۆڵینەوەدا دانی بە چەندین کاری تیرۆستیدا ناوە لەوانە (دانانی بۆمب لە سەر رێگای جەلەولا - شێخ باوە، کوشتنی منداڵیکی تەمەن 9 ساڵان و جوتیارێکی عەرەب بە ناوی (محارب) و چەندین کاری تیرۆستی دیکە لە سنوری جەلەولا و سەعدیە) و هەروەها دانی بەوەشدا ناوە کە سەر بە گروپێکی دەوڵەتی ئیسلامیە.

فەرهاد رەفعەت راشیگەیاند؛ ئەو تیرۆرستە کە خەڵکی ناوچەی (تبچ) بووە و دواتر هاتوەتە ناو شارۆچکەی جەلەولا و لەوێ نیشتە جێبووە؛ لەسەردەمی رژێمی بەعسدا ئەندازیارێکی شارەزا بووە لە بواری دروستکردن و چاندنی بۆمبدا.