نێچیرڤان بارزانی جێگری سه‌رۆكی پارتی دیموكراتی كوردستان سه‌ردانى دكتۆر به‌رهه‌م ساڵح سه‌رۆكی حكومه‌تی هه‌رێمی كوردستانى له‌ سلێمانى كرد.

له‌و دیداره‌دا كه‌ فازڵ‌ میرانی سكرتێری مه‌كته‌بی سیاسی پارتی‌ و دكتۆر خه‌سره‌و گوڵ ئه‌ندامی سه‌ركردایه‌تی یه‌كێتی‌ ئاماده‌ بوون، سه‌رۆكی حكومه‌تی هه‌رێمی كوردستان به‌گه‌رمی به‌خێرهاتنه‌وه‌ی نێچیرڤان بارزانی‌ و شانده‌ یاوه‌ره‌كه‌ی كرد دوای ئه‌نجامدانی سه‌ردانه‌ سه‌ركه‌وتووه‌كه‌یان بۆ كۆماری ئیسلامی ئێران.

نێچیرڤان بارزانی ئاكامی سه‌ردانه‌كه‌ی بۆ تاران ‌و دیدار‌ و كۆبوونه‌وه‌كانی وه‌فدی باڵای هه‌رێمی كوردستانی له‌گه‌ڵ سه‌رۆك كۆمار‌ و كاربه‌ده‌ستانی باڵای ئێران بۆ سه‌رۆكی حكومه‌تی هه‌رێمی كوردستان باس كرد به‌مه‌به‌ستی كۆتایهێنان به‌ ره‌وشی ناله‌باری سنووره‌كان‌ و كۆتایهێنان به‌و نائارامیه‌ی كه‌ ماوه‌یه‌كه‌ سنووره‌كانی هه‌رێمی كوردستانی گرتۆته‌وه‌ ‌و ته‌ئكیدكردنه‌وه‌ له‌سه‌ر چاره‌سه‌ركردنی كێشه‌‌ و گرفته‌كان به‌ دیالۆگ ‌و رێگه‌چاره‌ی ئاشتیانه‌ ‌و پاراستنی به‌رژه‌وه‌ندییه‌ باڵاكانی هه‌رێمى كوردستان.