د چارچۆڤا سه‌ره‌دانا خوه‌ ده‌ ژبۆ كۆمارا ئیسلامیا ئیرانێ؛ شاندا هه‌رێما كوردستانێ كو ل نێچیرڤان بارزانى جیگرێ سه‌رۆكێ پارتیا ده‌مۆكراتا كوردستانێ و فازل میرانى سه‌كره‌ته‌رێ مه‌كته‌با سیاسیا پارتیا ده‌مۆكراتا كوردستانێ پێكهاتبوو؛ ل تارانێ دگه‌ل مه‌حمود ئه‌حمه‌دى نه‌ژادێ سه‌رۆكێ كۆمارا ئیسلامیا ئیرانێ جڤیا.

د جڤینێ ده‌ تێكلى یێن ناڤبه‌را هه‌ردوو ئالیا و بێتر خورتكرنا وان و ره‌وشا نها یا ئیراقێ و پرۆسه‌سا گفتۆگۆ و دانوستانێن ژبۆ دامه‌زراندنا هوكوومه‌تا نوو یا ئیراقێ و هه‌ژماره‌كه‌ پرسێن گرێدایى هه‌ردوو ئالیا هاتنه‌ گفتۆگۆكرن.

وه‌كى دى د په‌یوه‌ندیه‌كه‌ ته‌له‌فۆنیا تایبه‌ت ب كوردستان تى ڤى ره‌؛ دكتۆر فوئاد حوسێن به‌شدارێ شاندێ راگه‌هاند كو به‌ریا نیڤرۆیا ئیرۆ شاندا هه‌رێما كوردستانێ ژبال عه‌لى لاریجانى سه‌رۆكێ پارله‌مێنتا ئیرانێ ڤه‌ هاته‌ پێشوازیكرن و د جڤینه‌كێ ده‌ هه‌ژماره‌كه‌ ته‌وه‌رێن گریدایێ ره‌وشا ئیرۆ یا ئیراقێ و دانوستانێن ناڤبه‌را فراكسیۆن و ئالى یێن سیاسى خستن به‌ر باس و ڤه‌كۆلینا و جڤینا رۆژا هه‌شتێ ڤێ مه‌هێ ل هه‌ولێرێ كو ل گۆر پێشده‌ستیا سه‌رۆكێ هه‌رێما كوردستانێ و به‌شداریا سه‌رۆكێن فراكسیۆنێن سه‌ركه‌تى یێن هه‌لبژارتنا ئیراقێ هاته‌ گرێدان؛ بلند هاته‌ نرخاندن.

پرۆسه‌سا دامه‌زراندنا هوكوومه‌تا نوو یا ئیراقێ و رونشتنا رۆژا پێنجشه‌میا بێت یا جڤاتا نوونه‌رێن ئیراقێ؛ ئالیه‌كێ دى یێ گفتۆگۆیێن ناڤبه‌را هه‌ردوو ئالیا بوو. د به‌شه‌كه‌ دى یا جڤینێ ده‌ ته‌كه‌ز لسه‌ر پێشده‌برنا تێكلى یێن ناڤبه‌را هه‌رێما كوردستان و كۆمارا ئیسلامیا ئیرانێ هاته‌ كرن. ل ئالیێ دى شاندا هه‌رێما كوردستانێ ژبال سه‌عید جه‌لیلى سه‌رۆكێ جڤاتا ئاسایشا نه‌ته‌وه‌ییا ئیرانێ ڤه‌ هاته‌ پێشوازیكرن و د هه‌ڤدیتنه‌كێ ده‌ ره‌وشا ئیرۆ یا ئیراق و هه‌رێما كوردستانێ و هه‌ول و پێشده‌چۆنێن داوى یێن سیاسى هاتنه‌ باسكرن و هه‌ردوو ئالیا ژى هیڤیا پێشده‌برن و به‌رده‌وامیا تێكلى یێن دۆستیتى یێن ناڤبه‌را هه‌رێما كوردستان و كۆمارا ئیسلامیا ئیرانێ خوه‌ستن.

Ktv