بەكارهێنانی ژن وەك چەكێكی سایكۆلۆژی بۆ بە كۆیلەكردن و خەڵاتی شەڕ

دامەزراندنی فیرقەی خەنسا بۆ جیهادی نیكاح

“شەڕانگێزەكان ناتوانن جێهان كاول بكەن،
ئەوەی دنیا كاول دەكات،
بیدەنگبوونە بەرامبەر رەفتاری شەڕانگیزەكان”

ئەلبێرت ئەینشتاین

سەنتەری وۆردۆ ولسن نامیلكەیەكی بە ناونیشانی: «بەربەریانیزم: داعش وەك هەڕەشەیەكی توند بۆ سەر ژنان» بڵاو كردۆتەوە، ئەم نامیلكەیە لە 11 كۆمێنت پێكهاتووە كە 11 خانم لە سەرانسەری جیهان نووسیویانە و تیایدا خانمێكی كورد بە ناوی زەكیە حەقی و خانمێكی عێراقی بە ناوی سەفیە سوهێل بەشدارییان تێدا كردووە و، هەریەكەیان بە تێڕوانینی خۆی هەم شرۆڤەی سەرهەڵدانی تیرۆریستانی داعش و راگەیاندنی خەلافەتە ئیسلامییەكەی دەكەن، هەمیش زۆر راشكاوانە ئەو رەفتارانەی (داعش)یان خستۆتەڕوو كە بەرامبەر ژن كردوویەتی، بەتایبەتی دوای داگیركردنی شنگال و بە كۆیلەكردن و فرۆشتنی كچان و ژنانی كوردانی ئێزیدی، شەبەك، توركمان، كریستیان و عەرەب، هەروەها هەوڵدان بۆ گۆڕینی ئایین و مەزهەبەكانیان. لەم راپۆرتەدا پوختەی هەندێك لەو بۆچوونانە دەخەینەڕوو.

بێدەنگی و بێ هەڵوێستیی دەوڵەتانی عەرەبی جیهانی كەڕ كردووە



سەرەتا پڕۆفیسۆر هالە ئەسفەندیار كە خانمێكی فارس زمانی خەڵكی ئێرانە و تۆێژەرە لەسەنتەری ناوبراو، جەخت لەسەر ئەوە دەكاتەوە كە لە دوای داگیركردنی موسڵ لەلایەن داعشەوە، ئەبوبەكری بەغدادی لەسەر مینبەرەوە خەلافەتی ئیسلامی راگەیاندووە و لەناو ئەم دەوڵەتی خەلافتەدا سیستمێك پەیڕەو دەكرێت كە لەسەر ئەم بنەمایانە داڕێژراوە: « كۆمەڵكوژی، سەربڕین و لەسێدارەدان، گۆڕینی ئایین بەزۆر، دەركردنی بە كۆمەڵ»، لەمەش زیاتر تیرۆریستەكانی ئەبوبكر بەغدادی شارەكان تاڵان دەكەن، مۆنۆمێنتەكان دەشكێنن، مەزارگە و كەنیسە و حوسەینییەی شیعەكان و دێری ئێزیدییەكان و هەر شتێك لەگەڵ بیروبۆچوونی ئایینی ئەوان نەگونجێت، دەیتەقێننەوە، بەڵام سەرباری هەموو ئەم كارە دڕندانانە رەفتارە وەحشییانە و بەربەرییەكانیان بەرامبەر بە ئافرەت شێوازێكی تایبەتییە و ئافرەت بە هەردوو شێوازی دیاری و ئامانج مامەڵەی لەگەڵدا دەكرێت. كاتێك تیرۆریستانی داعش شوێنەكان دەگرن، ئافرەت لە هەر تەمەنێكدا بێت، دەیگرن و پاشان وەك كۆیلە دەیانفرۆشن و وەك سەبایەش بەكاریاندەهێنن و ناچاریان دەكەن لەگەڵ تیرۆریستان سێكس بكەن، بۆیە ئافرەتان لە هەرتەمەنێكدا بووبن، لەبەردەستی داعش هەتك كراون، ژنە كریستیانەكان و ئێزیدییەكان ناچار كراون ئایینی خۆیان بگۆڕن.
دوای خستنەڕووی ئەم راستییانە خاتوو هالە ئەسفەندیار ئاماژە بەوە دەكات خەلافەتی ئیسلامی داعش ئەو هەموو رەفتارە دڕندانە و وەحشیگەرییانەی ئەنجامداوە، كەچی وڵاتانی عەرەبی بە رادەیەك بێدەنگن لە بەرامبەر تاوانەكانی داعش كە بێدەنگییەكەیان كەڕی كردووین، بۆیە دەبێت ئەو پرسیارە بكەین كە: ئەو حكومەتە عەرەبییانەی شانازییان بە خۆیانەوە دەكرد، بەوەی كە هێندە ژمارەی ژن لە قوتابخانە و زانكۆ و خوێندنی باڵا دەخوێنن و، هێندە ژمارەیان لە حكومەت بەشدارن و، هێندە ژمارەیان چالاكوانن لە بواری كۆمەڵایەتی، ئەو حكومەتانە هەموویان ئیمزایان لەسەر رێككەوتنە جیهانییەكان بۆ پاراستنی مافی ژن كردووە، ئیمزایان لەسەر مافەكانی مرۆڤ كردووە، بۆچی لە بەرامبەر بە كۆیلەكردنی ژنانی كریستیان و ئێزیدی و تەنانەت عەرەبیش بێدەنگییان هەڵبژاردووە؟ بێگومان ئەم بێدەنگییانەی دەوڵەتانی عەرەبی مانای ئەوەیە ئەوان دەیانەوێت جیهان بگێڕنەوە بۆ سەدەی حەوتەمی زایینی و نیمچە دوورگەی عەرەبی، ئەو سەردەمەی كە كچی كۆرپەلەیان زیندەبەچاڵ دەكرد و شەرمیان لە بوونی كچ دەكرد.

60 هەزار ئافرەتی دووگیان لە ژێر هەڕەشەی داعشدان



خاتوو رۆبین رایت كە ئەویش هەم تۆێژەرێكی گەورەیە و هەمیش رۆژنامەنووسێكی ناسراوە، لە كۆمێنتەكەی خۆیدا ئاماژەی بەوە كردووە، ئەوەی داعش بەرامبەر بە ژنان كردوویەتی و راپۆرتی لەسەر كراوە، وەك بە كۆیلەكردن و ئەوەی كە كڕین و فرۆشتنیان پێدەكات، ئەو راپۆرتانەن كە ناڕاستەوخۆ لەسەر زاری خەڵكانی دیكەوە وەرگیراون، لەمەدا رۆبین رایت ئەوەمان پێدەڵێت ئەو كۆمەڵگە تاریك و داخراوەی خەلافەتەكەی داعش دروستی كردووە، رێگەنادات رۆژنامەنووس و چالاكانی كۆمەڵگەی مەدەنی بە تەواوەتی راستیی كارەساتەكان و بەربەریەتی داعش ببینین، بەو حاڵەتەشەوە ئەوە دەركەوتووە كە تیرۆریستانی داعش بە شێوازی دڕندانە و جیاواز مامەڵە لەگەڵ ئافرەتان دەكەن، وەك (رفاندن، هەتككردن، كۆیلەكردنی بە ئاشكرا، جیهادی نیكاح لەگەڵ كچان و ژنانی كریستیان و ئێزیدی) ئەم رەفتارانەش نەك هەر تەنها پێشیلكردنی یاسای نێودەوڵەتی و مافەكانی مرۆڤە، بەڵكو ژێرپێنان و شكاندنی شەریعەتێكی ئاسمانییە و ئیسلامیش ئەوەی پێ قبووڵ ناكرێت.
ئەو ئافرەتانەی ئێستا بەوجۆرە داعش مامەڵەیان لەگەڵ دەكات، ژمارەیان دەگاتە 250 هەزار ئافرەت كە لە ناویاندا 60 هەزاریان دووگیانن، ئەمەش وایكردووە كە خەلافەتەكەی ئەبوبەكر بەغدادی و تیرۆریستەكانی، ژن بكەنە چەكێكی كاریگەر و لە شەڕەكانیان بەكاری بهێنن، ئەم چەكە، چەكێكی سایكۆلۆژی زۆر ترسناكە و دەبێتە هۆكاری ئەوەی كە هێزی بەرامبەر ناچار بێت لەبەردەم هێرشەكانی داعش هەڵبێت، نەبادا ژن و كچەكانیان بكەونە دەستی داعش، هەروەها وەك دەستكەوتی شەڕیش بەكاریان دەهێنن، كە دەبێتە هاندەر بۆ تیرۆریستەكان بۆ ئەوەی لە پێناوی ئەو دەستكەوتە خۆیان بە كوشت بدەن. ئەو ژن و كچانەی كریستیان و ئێزیدی كە لە چەند مانگی رابردوو كەوتنە دەستی تیرۆریستانی داعش هەموویان، جیهادی نیكاحیان لەگەڵ كراوە، ئەم جۆرە دەستدرێژیكردنە وەك جیهاد تەفسیری بۆ كراوە، بۆیە هەموو تیرۆریستەكان ئەو كارەیان لەگەڵ كردوون.

دروستكردنی فیرقەی خەنسا بۆ جیهادی نیكاح



خاتوو سەفیە سوهێل كە پێشتر پەرلەمانتاری عێراق بووە، ئاماژە بەوە دەكات كە ئەو جوگرافیایەی داعش خەلافەتەكەی تێدا راگەیاندووە، رووبەرەكەی لە دەوڵەتی ئەردەن گەورەترە، لەم خەلافەتەدا هەموو كارێكی ناشیرین و دڕندانە دەرەهەق بە ئافرەت دەكرێت، كە ئەویش جیهادی نیكاحە، ئەمە نەك هەر بەرامبەر ئەو ئافرەتانەی كە وەك دەستكەوتی شەڕ دەكەوێتە بەردەستیان، بەڵكو ئێستا ئەو ژنانەی سەر بە داعشن لە زۆربەی شوێنەكانی جیهان وەك (هەموو وڵاتانی عەرەبی، ئەوروپا، چین و ئەمریكا)، هانی كچان و ژنانی تەمەن 18-25 دەدەن كە بۆ جیهادی نیكاح پەیوەندی بە داعشەوە بكەن، ئەو ژن و كچانە هەموویان لە فیرقەیەكدا بەناوی فیرقەی خەنسا كۆكراونەتەوە، لەمەش زیاتر تیرۆریستانی داعش بۆ ئەوەی ببنە جێگەی متمانەی ئەمیرەكانی داعش خوشك و كچەكانیان لە تیرۆریستانی داعش مارە دەكەن. هەربۆیە رەفتاری دڕندانەی داعش بەرامبەر كچان و ژنان تەنها ئەو ئافرەتانە ناگرێتەوە كە لە شەڕەكاندا دەستگیر دەكرێن، یان دەڕفێندرێن، بەڵكو ژنانی خۆیان بەكار دەهێنن لە هەموو جیهان بۆ ئەوەی كچان و ژنانی موسڵمانان بۆ جیهادی نیكاح بهێننە نێو ریزەكانی داعشەوە. ئەو ئافرەتانەشی كە لە شەڕەكاندا كەتوونەتە بەردەستیان و پاشان كراون بە كۆیلە، بە 100 هەزار دیناری عێراقی كە دەكاتە 80 دۆلار فرۆشراون، كە لە هەموو نەتەوەكانی تێدا بووە، وەك: (كوردی ئێزیدی و شەبەك، كریستیان، توركمان، هەروەها عەرەبی شیعەش).
خاتوو سەفیە ئاماژە بەوە دەكات هێرشەكانی داعش بۆسەر ئەو شوێنانەی داگیری كردوون، بۆتە هۆكاری ئەوەی نزیكەی دوو ملێۆن خەڵك ئاوارە بن و ئەو خەڵكەی ئاوارە بوون نەیانتوانیوە هیچ شتێك لەگەڵ خۆیان بەرن، تەنانەت ئەڵقەی پەنجەیان و مۆبایل و خشڵ و زێڕەكانیان لەلایەن داعشەوە بە تاڵان براوە. بۆیە گرنگە كۆمەڵگەی نێودەوڵەتی بۆ پارستنی ئەو ئاوارانە پشتگیری تەواوی سوپای كوردستان و سوپای عێراق بكات، هەروەها بە پەلە دەوڵەتانی بەخشەر كۆنفرانسێك لەسەر ئەم پرسە گرێبدەن بۆ ئەوەی هاوكاری پێویست بۆ ئاوارەكان بنێرن.

كۆمەڵێك وڵاتی عەرەب هاوكاری داعش دەكەن


خاتوو كائینە بوهاشی چالاكوانی مافەكانی ئافرەت و پارێزەری نێودەوڵەتی لە وڵاتی جەزائیر، ئاماژە بەوە دەكات داعش، یان خەلافەتی ئیسلامی هیچ جیاوازییەكی لەگەڵ ئەو ئایدیۆلۆژییانە نییە كە لە وڵاتانی كەنداو و رۆژهەڵاتی ناوەڕاست و باكووری ئەفریقیا و تا دەگاتە سەب سەحرا بڵاو بۆتەوە. لەگەڵ بڵاوبوونەوەی ئەم ئایدیۆلۆژیەتەش ئیدی ئایینەكانی دیكە كە لەم ناوچەیە بوونی هەیە، دەكەوێتە بەر هەڕەشەی پاكتاوی رەگەزی، گۆڕینی ئایین بە زۆر، هەتككردنی ژنان، سەربڕین، بە كۆیلەكردن و فرۆشتنیان، ئەمەش واتە ئەم ئایدیۆلۆژیەتە دەمانگێڕێتەوە بۆ ئەو میراتەی كە پێش 1400 ساڵ لە نیمچە دوورگەی عەرەب هەبووە، سەبارەت بەو ئافرەتانەش كە كەوتوونە دەستی داعش، هێما بۆ ئەوە دەكات كە ئەوان ئێستا كەوتوونەتە نێوان دوو بەرداشەوە، ئەوەی داعش كردوونی بە كۆیلە و هەتكی كردوون، خۆ ئەگەر بگەڕێنەوە بۆ لای كەسوكاریان، بە بیانووی پاراستنی شەرف دەكەونە بەر هەڕەشەی كوشتن، ئەگەر لای داعشیش بمێننەوە، ئەوا یان تووشی ئایدز دەبن، یان دەكرێنە بۆمب و بۆ كاری خۆتەقاندنەوە ئامادەیان دەكەن، سەبارەت بە هەڵوێستی وڵاتانی عەرەبیش خاتوو كاهینە وێڕای ئەوەی ئاماژە بەوە دەكات كە وڵاتانی عەرەبی و رێكخراوەكانی كۆمەڵگەی مەدەنییان هیچ هەڵوێستێكیان بەرامبەر داعش نەبووە، لە هەمانكاتدا هەندێك لە وڵاتانی عەرەبی كارئاسانی و كۆمەكی داعشیان كردووە، هەروەها لە لایەن زۆر دەوڵەتی عەرەبییەوە كۆمەكی دارایی دەكرێن. سەبارەت بە رەگداكوتانی ئەم ئایدیۆلۆژیەتە توندڕەوە لە ناوچەكە، ئەم خانمە ئاماژە بەوە دەكات لە وڵاتانی كەنداو و رۆژهەڵاتی ناوەڕاست و دەوڵەتانی باكووری ئەفریقیا، ئەم ئایدیۆلۆژیەتە رەگی داكوتاوە، سیستمی خوێندن و ژینگەی كۆمەڵایەتی وڵاتانی عەرەبی زەمینەیەكی لەبارە بۆ بەرهەمهینانی گرووپە توندڕۆكانی وەك داعش و ئیخوان موسلمین، هەروەها ژینگەی دەوڵەتانی عەرەب نەوایەكی ئارامە بۆ گوتاری توندڕۆیی و پاراستنی گرووپە توندڕۆكان، لە زۆربەی وڵاتانی عەرەبی و بەتایبەتی لە دەوڵەتانی كەنداو، حكومەت باڵادەستە لە پێناسەی بیركردنەوەی سیاسیی هاووڵاتیاندا، ئەویش بیرێكی تەسكی قەومییەی عەرەبییە و هەروەها ئیستغلالی میدیا و كەرتی تایبەتیشیان بە بیرتەسكییەوە كردووە، هەر بۆیە ژینگەی وڵاتانی عەرەبی زەمینەی بۆ سەرهەڵدانی وەحشی داعشی دروستكردووە، لە ئێستاشدا ئەو وەحشەیان لە دەست دەرچووە و بۆیان كۆنتڕۆڵ ناكرێت.

داعش بەرهەمی قوتابخانە و مزگەوت و گوتاری كۆمەڵایەتی عەرەبە



خاتوو حەنین غەدار بێجگە لەوەی تۆێژەرە، لە ئێستادا بەڕێوەبەری نووسینی (NOW news)ی (لوبنانی)یە. ئەم خانمە وەك رۆژنامەنووسێك لەو خاڵەوە دەست پێدەكات، كاتێك داعش سەریهەڵدا چالاكوانە عیلمانییەكان و رۆشنبیران و رۆژنامەنووسانی رۆژئاوا، پێیانوابوو داعش بەرهەمی دەرەوەیە و هاتۆتە ناوچەكە و گوتارێكی مەزهەبییانەی سوننەی هەیە و سوودی لەو تەنگژە سیاسییە وەرگرتووە كە لە ناوچەكە بوونی هەیە، بەڵام ئەو رەفتارەی ئێستا داعش بەرامبەر ئافرەت دەیكات، بە ناوچەكەی ئێمە نامۆ نییە، جیاوازییەكەی ئەوەیە داعش بە جۆرێكی دیكە مانیفیستۆی كردۆتەوە، ئەمەش لەبەر ئەوەیە ئازادییەكانی ئافرەت لەلایەن هیچ سەركردە و حكومەتێكی عەرەبییەوە رێزی لی نەگیراوە و لەناو هەموو یاسا و دەستوورەكانی وڵاتانی عەرەبی ئافرەت وەك هاووڵاتی پلە دوو مامەڵەی لەگەڵ دەكرێ، لەوانەیە بەردبارانكردنی ئافرەت لەسەر زینا، یان سەربڕین خاڵی هاوبەشی نێوان داعش و حكومەتە عەرەبییەكان نەبێت، بەڵام داعش و حكومەتە عەرەبییەكان سەبارەت بە مامەڵەكردنیان بەرامبەر ئافرەت لە زۆر بواردا خاڵی هاوبەشیان هەیە و یەكتری دەگرنەوە. تیرۆریستانی داعش لەم كۆمەڵگەیەی ئێمە لەدایكبوون، لە قوتابخانەی ئێمە خوێندوویانە و لە مزگەوتەكانی ئێمە نوێژیان كردووە، هەروەها گوێیان لەو گوتارە كۆمەڵایەتییە گرتووە كە كۆمەڵگەی عەرەبی بەرهەمی هێناوە، بۆیە ئەگەر بەڕاستی دەمانەوێت داعش دووبارە نەبێتەوە، پێویستە لەو خاڵەوە دەست پێبكەین كە ژن وەك تاك سەیر بكەین، نەك پاشكۆی پیاو، یان شمەك و كەلوپەل.

دامەزراندی شوێنك بۆ قوربانییانی جیهادی نیكاح



خاتوو زەكیە حەقی كە لە ماوەی ساڵانی 2005-2010 پەرلەمانتاری عێراق بووە، لە كۆمێنتەكەیدا ئاماژەی بەوە كردووە، تیرۆریستانی داعش 500 كچی ئێزیدییان لە گوندەكانی كوردستان رفاندووە، ئەم كچانە لە تەمەنی منداڵی و هەرزەكارین و بەشێكیان تەنها 14 ساڵیان تەمەنە و هەموویان هەتككراون و مەترسییەكی گەورە لەسەر چارەنووسیان دروست بووە، بەتایبەتی كاتێك دووگیان دەبن، یان لە ئاكامی جیهادی نیكاح تووشی ڤایرۆسی ئایدز دەبن، هەروەها پرسیار دەكات كە ئافرەتێك بە رێگەی هەتككردن دووگیان كرابێت، ئاخۆ چ ئازارێكی دەبێت و چ كاریگەرییەك لەسەر دەروونی دروست دەبێت؟ لەبەر ئەوەی ئەگەر بگەڕێنەوە ئەوا رووبەڕووی گەورەترین مەترسیی كوشتن لەسەر نامووس دەبنەوە، خۆ ئەگەر نەكوژرێن و لە حاڵەتێكدا ئەمانە ئەگەر تووشی ئایدز بووبن، مەترسییەكی گەوەرە دروست دەكات، بۆیە دەبێت بەوجۆرە سەیری ئەم پرسە بكەین و ئەوە بخەینە بەرچاومان و بزانین ئەگەر كچێكی تەمەن 14 ساڵ لەم حاڵەتەدا بێت، ئەوا بژاردەی زۆر كەمی لەبەر دەست دەبێت و لەوانەیە ناچار بێت بە تەواوەتی بڕیار بدات لەگەڵ داعش بمێنێتەوە، لەم كاتەشدا مەترسی ئەوە دروست دەبێت، تیرۆریستانی داعش بە بیانووی چوونە بەهەشت و بەڵێنی دیكە وەك تیرۆریست رایان بهێنن و بیانكەن بە تیرۆریستی خۆكوژ و دژی خۆمان بەكاریان بهێننەوە، بۆیە دەبێت بیر لەوە بكرێتەوە ئەم قوربانییانە بپارێزین. لەوانەیە هەندێك لەو ئافرەتانەی رووبەڕووی هەتككردن دەبنەوە، بیشارنەوە، یان ناوی خۆیان تۆمار نەكەن، بۆیە پێشنیار دەكەم شوێنێك بۆ قوربانییانی جیهادی نیكاح دابمەزرێت و نەتەوە یەكگرتووەكانیش بۆ پاراستنی ئەم قوربانییانە بڕیارێك دەربكات و فەرزی بكات هەموو دەوڵەتانی رۆژهەڵاتی ناوەڕاست بەو بڕیارەوە پابەند بن، بۆ ئەوەی ئەم قوربانییانە رزگار بكرێن و دووبارە تیكەڵی كۆمەڵگە بكرێنەوە.

دیمەنی ژنانی ئێزیدی رابردوو، ئێستا و داهاتوو



خاتوو یاسەمین سەید هانی سەرنووسەری رۆژنامەی ئەخبار لە قاهیرە، بەچاوێكی رۆژنامەنووسانە كۆمێنتی لەسەر ئەم بابەتە گرنگە نووسیوە و ئاماژە بەوە دەكات كە ئەگەر سەیری ئەو دیسكە بكەن كە كاری لەسەر كردووە و تیایدا سەیری شریتی هەواڵەكانی بكەن، دەبینن بەشی هەرە زۆری، هەواڵی ئەو شوێنانەی عێراقە كە داعش داگیری كردوون، ئەمەش سەردێڕی هەموو كەناڵەكانی جیهان بووە، هەروەها دەڵێت: «من وەك رۆژنامەنووسێك زۆر باش لە كێشەكانی عێراق تێگەیشتووم و شرۆڤەشم بۆ كردوون، ئێمە بە ئاشكرا قاعیدەمان رەتكردەوە، بەڵام داعش لە قاعیدە ترسناكتر دەركەوتەوە، كە بووە ترسناكترین رێكخراوی تیرۆریستی لە جیهاندا».
ئەو خاتوونە میدیاكارە لە درێژەی شرۆڤەكەیدا باسی ئەوە دەكات كە دیمەنی كۆمەڵكوژیی و دەركردنی كوردانی ئیزدی ئەوەمان پێدەڵێت: ئافرەت لە هەمووان زیاتر دووچاری كارەسات دەبێتەوە، لەبەر ئەوەی ئافرەت لە كۆمەڵگەی ئێمەدا لاوازە و چەوسێندراوەتەوە، هاوكات سێ وێنە دەخاتەڕوو كە بەمجۆرە باسیان دەكات: «من كاتێك دیمەنی ئافرەتێكی پیری ئێزیدی دەبینم هەست دەكەم ئەمە رابردووە، لەبەر ئەوەی لاوازیی ئافرەتمان لە رابردوو پیشان دەداتەوە، ئەو ژنە پیرە كە سواری گوێدرێژێك بووە و گەنجێك دەیپارێزت، چەند گوێدرێژەكە بڕوات، ئەو بیری دەگەڕێتەوە بۆ لای باوكی و ئەو رۆژانەی بیر دێتەوە، بۆیە ئەو كاتێك هەنگاو بۆ ئایندەیەكی نەزانراو هەڵدەگرێت، بیر لە رابردوو دەكاتەوە. وێنەیەكی دیكە كە لە بەردەستمە دایكێكە كە منداڵێكی دوو ساڵانەی لەباوەش كردووە و لەسەر زەوی دانیشتووە بۆ ئەوەی پشوویەك بدات، دوای برینی رێگەیەكی دوور و درێژ، ئەم ژنە ئێزیدییە كە سەیری منداڵەكەی دەكات لە باوەشیدا نووستووە و مەمەی شیرەكەی بەتاڵە، دەست دەكات بە گریان، فرمێسكەكانی ئەو دایكە كارەساتی ئێستامان پیشاندەدات. وێنەی سێهەمیان كچێكی تەمەن شەش ساڵانەی ئێزیدییە لەگەڵ خێزانەكەی و لەگەڵ هەموو تەمەنە جیاوازەكان هەنگاو هەڵدەگرێت، ئەم كچە جانتەیەكی لە پشتە و دەبەیەك ئاو لەسەر شانیەتی، ئەم كچە سەیری پێشەوە دەكات و دانانیشێت و لەوانەیە بیر لەوە بكاتەوە كەی ئەم گەشتە كۆتایی دێت، بۆیە كاتێك دەبە ئاوەكە و جانتاكەی دادەنێت، هاوار دەكات و دەست بە گەمەكردن لەگەڵ منداڵەكانی دیكە دەكاتەوە، چونكە نازانێ چی لە دەوری روو دەدات و لەوانەیە بیری بەوجۆرە بێت ئایندە باشتر دەبێت. ئەم سێ دیمەنە زۆر زیاتر لە هەواڵەكانمان پێدەڵێت و من دەڵێم: شەرمەزارییە لە جیهانی هاوچەرخدا ئەم جۆرە كارەساتانە روودەدەن».