هەوڵەكانی عێراق بۆ ڕێگەگرتن لە بەزۆرناردنەوەی پەنابەرانی درێژەیان هەیە. لە ئێستادا شاندێكی كۆمیسیۆنی باڵای پەنابەرانی جیهان لە عێراقن، تا ئەو ڕێككەوتننامانە هەڵبوەشێندرێنەوە كە پێشتر عێراق بۆ ڕێگەدان بە ناردنەوەی پەنابەران واژۆی كردبوون.

ئەندامی لیژنەی كۆچ و كۆچبەرانی عێراق (ماجید محەممەد حەفید)، باس لەوە دەكات كە كۆمیسیۆنەكە داوایان لە حكوومەتی عێراق كردووە تا گشت ئەو ڕێككەوتننامانە هەڵبوەشێنێتەوە كە لەگەڵ چەند وڵاتێكی ئەورووپاییدا واژۆی كردبوون. بۆ بیرهێنانەوە، حكوومەتی بەغدا لە بەرانبەر لێخۆشبوون لە بەشێك لە قەرزەكانیدا، لەگەڵ وڵاتانی (سوید، دانیمارك، هۆڵەندا) ڕێك كەوتبوو تا پەنابەرانی عێراق بەزۆر بنێدرێنەوە.


لە ماوەی چەند ساڵی ڕابردوودا، لە ڕێگەی فڕۆكەخانەی بەغداوە، بە هەزاران پەنابەری عێراقی لە ئەورووپا و چەند وڵاتێكی عەرەبییەوە دیپۆرت كراونەتەوە كە كوردیشیان تێدا بووە. ڕۆژی 23ـی مانگی ڕابردوو، حكوومەتی عێراق بە فەرمی ڕایگەیاند كە ئیتر هیچ دیپۆتكراوێك وەرناگرێتەوە؛ ئەمەیش چونكە بە پێی ڕێككەوتننامە جیهانییەكان، نابێ هیچ پەنابەرێك بەزۆر بۆ وڵاتەكەی بنێدرێتەوە. بە گوتەی (ماجید حەفید)، هەوڵەكان بۆ ئەوەیە كەس بە زۆر نەنێردرێتەوە، بەڵام ئەوانەی خۆیان دەگەڕێنەوە هەوڵ بدرێت قەرەبوو بكرێنەوە و حكوومەتی عێراقیش خزمەتگوزارییان پێشكەش بكات.


فیدراسیۆنی پەنابەرانی عێراق، پڕۆژەیاسایەكی 16 ماددەیی بە پەرلەمان و حكوومەتی عێراق داوە، تا لەو ڕێگەیەوە هاوكاری پێشكەش بە پەنابەرانی دیپۆرتكراو بكرێت. پڕۆژەیاساكە داوای ئەمانەی كردووە: پێشكەشكردنی خزمەتگوزاری گشتیی، پێدانی پێشینەی هاوسەرگیری و خانووبەرە، دابینكردنی كار، پێدانەوەی ڕەگەزنامە، گەڕاندنەوەی موڵك و ماڵ. ئەندامەكەی لیژنەی كۆچ و كۆچبەران، ئاماژەی دا كە پێشتگیری ئەو پڕۆژەیاسایەیان كردووە و داوای هاریكاریكردنی پەنابەرانی گەڕاوە دەكەن.