دوای ئه‌وه‌ی ئه‌نجومه‌نی پارێزگای سه‌ڵاحه‌دین به‌زۆرینه‌ی ده‌نگ ره‌زامه‌ندی نیشاندا له‌سه‌ر به‌هه‌رێمكردنی پارێزگاكه‌یان، كوتله‌ی عیراقییه‌ی سپی له‌ دووتوێی به‌یاننامه‌یه‌كدا داوای له‌ئه‌نجومه‌نی پارێزگای سه‌ڵاحه‌دین كرد له‌بڕیاری به‌هه‌رێمكردنی پارێزگاكه‌یان پاشگه‌زببنه‌وه‌، چونكه‌ ئه‌و بڕیاره‌ له‌گه‌ڵ گیانی نیشتمانپه‌روه‌رێتی سه‌ركرده‌ سیاسییه‌كانی ئه‌و پارێزگایه‌دا یه‌كناگرێته‌وه‌.
هاوكات له‌و به‌یاننامه‌یه‌دا د.قوته‌یبه‌ جبوری سه‌رۆكی كوتله‌كه‌و جێگری پارێزگاری سه‌ڵاحه‌دین، ئاماژه‌ به‌وه‌ ده‌كات ئه‌و بڕیاره‌ی ئه‌نجومه‌نی پارێزگاكه‌یان هه‌ڵه‌شه‌بووه‌و هه‌ڵچوونی پێوه‌دیاره‌و بۆ ئه‌وانیش وه‌كو شۆكێك بووه‌.
هه‌روه‌ك چاوه‌ڕوانده‌كرێت له‌ماوه‌ی ئه‌م هه‌فته‌یه‌دا به‌ڕه‌سمی ئه‌و بڕیاره‌ی ئه‌نجومه‌نی پارێزگای سه‌ڵاحه‌دین بخرێته‌ به‌رده‌م حكومه‌ت و په‌رله‌مانی عیراق.