دەوڵەتی یاسا: عێراقییە هەوڵی دواخستنی ناونانی وەزیرە تەناهییەكان دەدات
عەلی شەلا ئەندامی دەوڵەتی یاسا ئەمڕۆ سێشەم بەئاژانسی كوردستان بۆ دەنگوباس (ئاكانیوز)ی راگەیاند، زیادكردنی 2 ناوی تر بۆ لیستی پاڵاوكەكانی پۆستی وەزارەتی بەرگری لەلایەن لیستی عێراقییەوە، بەشێكە لەو هەوڵانەی عێراقییە كە ماوەی 2 مانگە بۆ دواخستنی ناونانی وەزیرە تەناهییەكان كاری لەسەر دەكات.
ئاماژەی دا بەوەی عێراقییە لەلایەك ناوی پاڵاوكەكان ڕەوانەی دەستەی لێپرسینەوە و دادوەری دەكات، لەلایەكی تریش سەرۆكی ئەنجوومەنی نوێنەران داوا لە ئەنجوومەن دەكات لە پشووەكانیان ئاسوودە بن و دەنگدانیش لەسەر وەزیرە تەناهییەكان دوا دەخات.
شەلا ڕوونی كردەوە، مالیكی بەشێوەیەكی پیشەگەری و بابەتیانە مامەڵە لەگەڵ ئەو بابەتە دەكات و لێكۆڵینەوەیەكی تێروتەسەل بۆ ناوە پێشكێشكراوەكان دەكات و هەموو لایەنێكی سیاسیش بۆچوونی خۆی لەبارەیانەوە دەردەبڕێ، پاشان ناوەكان ڕەوانەی ئەنجوومەنی نوێنەران دەكرێ بەمەبەستی دەنگدان لەسەری بەپێی ئەو میكانیزمەی نووری مالیكی پێڕەوی دەكات.
لیستی عێراقییە 2 ڕۆژ لەمەوبەر 2 ناوی تری خستە سەر لیستی پاڵاوكەكان بۆ پۆستی وەزارەتی بەرگری لەوانە، غافل نووری غافل دلێمی و مەجید عەبد نەسیف زوبێدی.
زیادكردنی 2 ناوی تر بۆ لیستی پاڵاوكەكانی پۆستی وەزارەتی بەرگری لە كاتێكدا دێت كە لیستی عێراقییە بەسەرۆكایەتیی ئەیاد عەلاوی و تەباییی دەوڵەتی یاسا بەسەرۆكایەتیی نووری مالیكی گەڕێكی تری گفتوگۆیان دەست پێ كردەوە، بەمەبەستی چارەسەركردنی كێشە هەڵواسراوەكانی نێوانیان و ڕێككەوتن لەسەر ناونانی وەزیرە تەناهییەكان و ئەنجوومەنی نیشتمانی بۆ سیاسەتە ستراتیجییەكان كە بڕیارە ئەیاد عەلاوی سەرۆكایەتی بكات.
پێشتر بارستە سیاسییەكان ڕێككەوتن لەسەر ئەوەی پۆستی وەزارەتی ناوەخۆ بۆ هاوپەیمانیی نیشتمانی و پۆستی وەزارەتی بەرگریش بۆ لیستی عێراقییە بێ، بەڵام هەردوولا پاڵاوكی لایەنەكەی تر ڕەت دەكەنەوە بەبیانووی نەبوونی بێلایەنی و لێهاتوویی پاڵاوكەكان.
21ی كانوونی یەكەم/دیسێمبەری ڕابردوو ئەنجوومەنی نوێنەرانی عێراق متمانەی بەحكوومەتی ناتەواوی نووری مالیكی دا، هاوكات مالیكی كە وەزارەتە تەناهییەكان بەوەكالەت بەڕێوە دەبات، بەڵێنی دا بەوەی لە ماوەی 2 هەفتەدا وەزارەتە تەناهییەكان ناو بنێ، بەڵام بەهۆی ڕێك نەكەوتنی بارستەكان تا ئێستا یەكلا نەكراونەتەوە.
