مارکۆ ریۆس هێرشبەری یانەی بۆرووسیا دۆرتمۆند و هەڵبژاردەی ئەڵمانیا، رایگەیاند، پێکانەکەی رێگەی پێنادات لەگەڵ هەڵبژاردەی ئەڵمانیا بەشداری لە جامی کیشوەرەکان- 2017 بکات کە 17 ئەم مانگە لە رووسیا بەڕێوەدەچێت.

دوای دووچاربوونی بە پێکان لە فایناڵی جامی ئەڵمانیا لە مانگی رابردوو، ریۆس بەهیوابوو بەزوویی لە پێکانەکەی چاکبێتەوە، تاوەکو بەشداری لە جامی کیشوەرەکان بکات ، بەڵام بەهۆی ئەنجامدانی نەشتەرگەری بۆ لێکدانی بەستەرەکانی ئەژنۆی لە چوارشەممەی رابردوو، پزیشکەکان پێیان راگەیاندووە، تاوەکو ساڵی 2018 بیر لە تۆپ مەکەوە و قاچت بەری ناکەوێت.

ریۆس زۆر بێ شانس بووە لەگەڵ هەڵبژاردەی ئەڵمانیا، لە مۆندیالی 2014ی بەرازیل و یۆرۆی 2016ی فەرەنسا هەر بەهۆی پێکان نەیتوانی بەشداری بکات، لەکاتێکدا ئەو لە هەردوو کاتەکدا لە لووتکەی ئاستبەرزیدابوو.

محمد سلێمان