دونیا سەباح یاریزانی تیپی فوتساڵی ئەفرۆدێت
ئەنجامنەدانی پاڵەوانێتی کاریگەری زۆری دەبێت
یانەی وەرزشیی ئەفرۆدێت یەکێک لەم یانانەی کە تایبەتە بە یارییەکانی ئافرەتان لە شاری سلێمانی و تیپی تۆپی فوتساڵی یانەکەش یەکێک لە تیپە ھەرە بەھێزەکانی سەر ئاستی ھەرێمی کوردستان و عێراقە کە خاوەنی چەندین ئەنجامی شایستە و کچە یاریزانانی بەتوانایە ، یەکێک لە یاریزانە بەتواناکانی یانەکەش کچە یاریزان دونیائەو بە ئاستە بەرزەکەی ھەموولایەکی سەرسام کردووە کە خاوەنی چەندین ئەنجامی شایستەیە لەگەڵ یانەکەی لە ھەردوو خولی تۆپی فوتساڵی کوردستان و عێراقیش ، ناوبراو لەدایک بووی ساڵی ١٩٩٣ی شاری کەرکووکە و قوتابی کۆلێژی پەروەردەی وەرزشیە لە زانکۆی سلێمانی و پێشووتریش بۆ ھەریەک لە یانەکانی چەمچەماڵ و ئاشتی و سیروانی نوێ لە ھەردوو یاری فوتساڵ و گۆڕەپان و مەیدان یاری کردووە ئێمەش لە نزیکەوە چەند پرسیارێکمان ئاڕاستەی کرد ئەویش وەڵامی پرسیارەکانی گۆڤاری گوڵانی دایەوە.
کارزان کانەبی
*ئاستی یاری تۆپی فوتساڵ چۆن دەبینی ؟
- ئاستی یاری فوتساڵ لە ئێستایە لە بەرەو پێش چوندایە لە چاو ساڵانی پێشوو.
*ئەنجامدانی پاڵەوانیەتی کەم تا چەند دەبێتە ھۆکار بۆ ئەوەی ئاستی ئەم یارییە بەرەوو پێش نەچێت؟
- بێگومان ئەنجامنەدانی پاڵەوانێتی کاریگەری زۆری دەبێت لەسەر بەرەو پێش نەچوونی یارییەکە و گرنگی کەم دەبیتەوە.
*پێت باشە چی بکرێت بۆ ئەوەی یاری تۆپی فوتساڵی کچان بەرەوو پێش بچێت؟
-یاری تۆپی فوتساڵی کچان لە ئێستایە زۆر بەرەو پێش چووە گرنگی پێدەدرێت بەڵام ماومانە و دەبێت لە خوێندنگا بنەڕەتیەکانەوە گرنگی بە دەرخستنی کچە بەھرەمەندەکان بدرێت و کردنەوەی فێرگەی تایبەت بەو یاریە لە ئاستی منداڵیەوە بۆ ئەوەی لە داھاتوودا یاریزانی بەتوانا پێبگەن و گرنگی تایبەت بەو فیرگانە بدرێت لەلایەن حکومەتەوە.
*گرفتی یارییەکانی تۆپی فوتساڵ لە چی دەبینی؟
- گرفتی یارییەکە بە زۆری نەبوونی یاریگای تایبەت بەم یارییە و کەمی کەسانی ئەکادیمی بۆ درووست کردن و پێگەیاندنی کچان و کەمی ئەنجامدانی پاڵەوانێتی.
*لە ھیچ یانەیەک گرێبەستت پێشکەش نەکراوە؟
- لە ئێستادا یاریزانی یانەی ئافرۆدێتم و بەردەوامم لەو یانەیە و بە نیازی جێھێشتنی یانەکەش نیم.
*بەنیازی چی بۆ داھاتووی خۆت وەکو کچە یاریزانێک؟
- بۆ داھاتووم پشت بەخوا پلانم زۆرە و خزمەت کردنی وەرزشی کچانە بە گشتی و بەتایبەتی بگەمە ئاستێکی نێودەوڵەتی لە بواری ڕاھێنەری.
*لەگەڵ ئەوەی یانەکان پشت بە ڕاھێنەر و یاریزانی بیانی ببەستن؟
- نەخێر لەگەڵ ئەوە نیم پشت بە یاریزانی بیانی ببەسترێت، بەڵام دەکرێت ڕاھێنەری بیانی بھێنرێت بۆ ئەوەی بواری ڕاھێنان بەرەو پێش بچێت ڕاھێنەری خۆمالێ سوود وەربگرن لێیان.
*داواکاری و پێشنیارت بۆ لایەنی بەرپرسی وەرزشی؟
- داواکاری من و زۆربەی یاریزانەکانیشە گرنگی بە وەرزشی کچان بدرێت و بە کردنەوەی پاڵەوانێتی و سپۆنسەری کردنی یانەکانی تایبەت بە کچان ڕێکخستنی گەشتی وڵاتانی دەرەوە بۆ وەرگرتنی ئەزمون لێیانەوە بۆ ئەوەی بتوانرێت خزمەتی زیاتری کچان و ئافرەتان بکرێت.
*خەونی وەرزشیت چیە وەکو یاریزانێک؟
- خەونی وەرزشیم ئەوەیە بگەمە ئاستێکی بەرز لە یاریکردندا و بەشداری کردن لە پاڵەوانێتیە نێودەوڵەتیەکان.
*بەھیوای ئەوەنیت ھەڵبژاردەی کوردستان دابمەزرێ و تۆش یەکێک بیت لە یاریزانانی ھەڵبژاردەکە؟
- خەونی ھەموو کچێکی وەرزشکاری کوردە کوردستان ببێتە وڵات و ھەڵبژاردەی خۆمان ھەبێت و بگاتە ھەڵبژاردەی خاکەکەی و یاری بۆ بکات.
*لە ھەڵبژاردەی تۆپی پێی عێراق داواکراوی؟
- بەڵێ بەڵام بەھۆکاری تایبەتی نەمتوانی بڕۆم.
*بەچ یاریزانێکی جیھانی سەرسامیت؟
- بە یاریزان ڕۆنالدینھۆ و زێدان و ئینێستا.
*ئەگەر شتێکت ماوە لە کۆتایدا؟
-لەکۆتاییدا دەمەوێ سوپاسی باوک و دایکم بکەم بەتایبەتی ئەوان ھۆکاری سەرکەوتنی منن لە ژیانی وەرزشیم و سوپاسی ئێوەش ئەکەم کە یاریزانەکان بەسەر ئەکەنەوە بەم بەسەر کردنەوەیەش خزمەتێک بە وەرزشی کچان دەگەیێنن.ھیوای سەرکەوتنتان بۆ ئەخوازم.