سەلوا عەبدولقەھار یاریزانی تۆپی پێی گازی باکوور
ئەگەر وەرزش بەمشێوەیە بەردەوام بێت، بەنیازی ئەوەم بە یەکجاری واز بێنم
شارەکانی کوردستان خاوەنی چەندین یانەی تایبەت بە ئافرەتانن لە یارییە جۆراوجۆرەکان ، یانەی گازی باکووریش لە شاری کەرکووک بەردەوام گرنگی بە ئاست و توانای یاریزانان کچ دەدات لەسەر ئاستی شاری کەرکووک و شارەکانی تری کوردستانیش ، یەکێک لە یاریزانە بەتواناکانەیش کە پاشە رۆژێکی باش لە چاوەڕوانی ئەودایە، کچە یاریزان سەلوا عەبدولقەھارە ناوبراو لە دایکبووی ساڵی ١٩٩٨ی شاری ھەولێرە و یاریزانی یانەی گازی باکوور و ھەڵبژاردەی نیشتیمانی عێراقە پێشووتریش بۆ یانەی ئافرەتانی ھەولێر یاری کردووە ، سەلوا خاوەنی چەندین ئەنجامی شایستەیە لەسەر ئاستی کوردستان وعێراق ئێمەش لە نزیکەوە چەند پرسیارێکمان ئاراستەی کرد ، ئەویش وەڵامی پرسیارەکانی گۆڤاری گوڵانی دایەوە.
دیمانە: کارزان کانەبی
*چۆن بوو ھاتیتە نێو ژیانی وەرزشیی؟
-وەکو ھەموو یاریزانێکی تر ئاشنابوونم بۆ وەرزش دەگەرێتەوە بۆ قۆناخەکانی منداڵی منیش وەکو زۆربەی یاریزانەکان سەرەتای پەیوەندی کردنم لە قوتابخانەکانەوە بوو.
*بۆچی لەناوئەم ھەموو یارییە وەرزشیە جۆراوجۆرە یاری فوتساڵت ھەڵبژارد؟
- ھەستم دەکرد زیاتر لەم یارییە دەتوانم ئاستی شایستە پێشکەش بکەم بۆیە ئەم یارییەم ھەڵبژارد.
* ئاستی یاری فوتساڵ چۆن دەبینی لە کوردستان ؟
-ئاستی یاری فوتساڵ بەھۆی نەبوونی پارە و پەرەپێدانەدانی لەلایەن یانەکان و سەرۆکەکان و لێژنەکان بەتەواوی ئاستی ئەم یارییە لە دابەزیندایە ئەمەش ھۆکارەکەی ئاشکرایە کە بۆچی ئەم دۆخە گەیشت.
* ھەست ناکەی ئەم یارییە پشتگوێ خراوە؟
- بەداخەوە نەبوونی پاڵەوانیەتی بێگومان وای لێ کردووە ، کە ببێتە ھۆکار بۆ پێشنەکەوتنی ئاستی ئەم یارییە و بگرە پشتگوێ خستنیشی.
*کردنەوەی کەمی پاڵەوانیتی ئێوە سارد ناکتەوە لەم یارییە؟
- بێگومان چۆن ئێمەش یاریزانین پێویستمان بە کردنەوەی خولی بەردەوامە بۆ ئەوەی ئاستمان دانەبەزێ ئەگەر ھیچ خولێک نەبێت ئێمەش بێزار دەبین لەم کاتانەدا یارییە وا بڕوات لە ناو دەچێت.
* چی بکرێت باشە بۆ ئەوەی ئاستی ئەم یارییە لە شارەکانی کوردستان بەرز بکرێتەوە؟
-کردنەوەی پاڵەوانیەتی بەردەوام بۆ یاریزانان بۆ ئەوەی ئاستی یارییەکە بچێتە قۆناخی تازەوە ، ئەمەش لەدەستی لێژنەی فوتساڵ و حکومەتە دەبێ پەرە بەم یارییە بدەن، جگە لەوەش متمانە دان بە یانەکان بۆ ئەوەی یاریزانان بھێنن ، پەیداکردنی سپۆنسەر بۆ یانەکان ئەگەر ئەم کارانە بکرێت بێگومان ئاستی فوتساڵ زۆر بەرز دەبێتەوە.
* گرفتی وەرزشی یاری فوتساڵ لە چی دەبینی ؟
-لە بێ پارەیی و گرنگیدان نەدان بە یارییەکانی وەرزشیی ئافرەتان ئەوانە ھەمووی کێشەن لەبەردەم گەشەنەکردنی ئاستی وەرزشیی کچان لە شارەکانی کوردستان.
* ھیچ یانەیەک گرێبەستی پێشکەش نەکردووی؟
-لەدوای یانەی گازی باکوور من لەگەڵ یانەی ئافرەتانی ھەولێر گرێبەستم ھەیە، بۆ ھیچ یانەیەکی تریش یاریم نە کردووە ، ئێستاش ھیچ گرێبەستێکم بۆ نەھاتووە، چونکە ھیچ یانەیەک پارەی نییە، جگە لەوەش خوڵ نییە چۆن یاریزان بھێنێت.
* بەھیوای لە ژیانی وەرزشیت؟
- ھیوام نییە چونکە ئەگەر ھەر ببینم وەرزشیی تۆپی پێی بەم شێوەیە بێ بایەخ بێت بەنیازی ئەوەم بە یەکجاری واز لە وەرزش کردن بێنم، چونکە ھیچ خولێک نە بێت و مەشقەکانمان نەبێت ئیتر بۆ وەرزش بکەم.
*لە خێزانەکەت بەتەنیا وەرزش دەکەی؟
- نەخێرو خێزانەکەمان ھەموویان وەرزشوان بوون ، بەڵام ئێستا تەنیا خۆم وەرزش دەکەم ، ئەم قەیرانە ڕەنگە ئێمەش بێ بەش بکات لە وەرزش کردن.
*پەیامت چییە بۆ بەرپرسانی وەرزشی؟
-تکاییان لێ دەکەم کە پەرە بەتوانای وەرزشکاران بدەن بە تایبەتی وەرزشی ئافرەتان ھیچ جیاوازییەک نابینم لە نێوان کوڕو کچ بۆ وەرزش دەبێ لەلایان بەرپرسان وەکو یەک گرنگییان پێ بدرێت ، خولیان بۆ بکرێتەوە .
*چۆن بوو پەیوەندیت بە یانەی گازی باکوور کرد ؟
-ئەوان بەفەرمی داوایان لە من کردبوو بۆ یاری کردن منیش بەخۆشحاڵیەوە داواکەی ئەوانم قبوڵ کرد.
*بەچ یاریزانێکی جیھانی سەرسامی؟
-بە ھەریەک لە یاریزانان کریستانۆ رۆنالدۆ و مەسعود ئۆزێل بە یاری کردنی ئەوان سەرسامم.
*باشترین ئەنجامت لەگەڵ یانەکان.؟
-بەدەستھێنانی نازناوی خولی تۆپی پێی یانەکانی عێراقی لە ١١ یاریزانی لەگەڵ یانەی گازی باکوور ، بۆمن ھەمیشە ئەنجام بووە کە شانازی پێوە بکەم.
*لە کۆتایدا دەتەوێت چی بلێ؟
-سوپاس بۆ گۆڤاری گوڵانی خۆشەویست ئێوە ھەمیشە پێشەنگن لە ناساندنی یاریزانان، سوپاس بۆ دایک و باوکم ھەمیشە ھاورێ و ھاوکارم بوونە لە ھەموو شتێکی ژیانم ھیچ کات رێگرییان لێ نەکردوومە لە وەرزش کردن.