وا بریارە سبەی دووشەممە شاندێكی گەورەی یەكێتی تۆپی پێی عێراق سەردانی هەرێمی كوردستان بكات، بەمەبەستی چاوپێكەوتن لەگەڵ لایەنە پەیوەندارەكانی بواری وەرزش لە هەرێمی كوردستان بۆ گفتوگۆكردن لەسەر بابەتی كشانەوەی هەردوو یانەی هەولێر و زاخۆ لە خولی نایابی عێراق بۆ تۆپی پێ.
شاندەكەی یەكێتی تۆپی پێی عێراق پێكهاتووە لە (عەلی جەبار) جێگری سەرۆكی یەكێتی تۆپی پێی عێراق و ئەندامانی یەكێتیەكە (كامل زەغیر، یحیی زەغیر، فالح موسا، یحیی كەریم) و (محەمەد خەلەف) بەرپرسی راگەیاندنی یەكێتی تۆپی پێی عێراق و (عەلی ئەسەدی) سەرۆكی دەستەی كارگێری یانەی كارەبا.
ئامانجی شاندەكە چۆنیەتی چارەسەركردنی ئەم كێشەیە و پاشگەزبوونەوەی هەردوو یانەی هەولێر و زاخۆ لە بریاری كشانەوەیان لە خولی نایابی عێراق بۆ تۆپی پێ.
چاوەروان دەكرێت لە رۆژانی داهاتوو شاندێك لە وەزارەتی وەرزش و لاوانی عێراقیش سەردانی شاری هەولێر بكات و هەروەها لە شاری نەجەف شاندێكی گەورە سەردانی شاری هەولێر دەكەن بەمەبەستی پێشكەش كردنی داوای لێبوردن و چارەسەركردنی ئەم بابەتە، كە لە یاری هەولێر و نەجەف روویدا.
رێبین رەمزی