وا بریارە ئەمرۆ پێنجشەممە لە یاریگەی بەرازیلیا نیشتمانی لە شاری بەرازیلیا پایتەختی بەرازیل كاتژمێر 7ی ئێوارە بەكاتی كوردستان هەڵبژاردەی تۆپی پێی عێراق یەكەم یاری خۆی لە كۆمەڵەی یەكەم بەرانبەر هەڵبژاردەی دانیمارك ئەنجام دەدات.
یاریگەی بەرازیلیا نیشتمانی شوێنی 71 هەزار هاندەر دەبێتەوە و چەند بلیتێكی یارییەكە بەشێوەیەكی خۆرایی بەسەر هاندەرانی عێراق دابەش دەكرێت و ناوبژیوانێكی مەكسیكی یارییەكە بەرێوە دەبات.
بۆ ئەم یارییە هەڵبژاردەی عێراق بەم پێكهاتەیە یاری دەكات:
محەمەد حەمید (گۆڵپارێز)
هێڵی بەرگری: ئەحمەد ئیبراهیم- مستەفا نازم - عەلی عەدنان - عەلا مەهاوی
هێڵی ناوەراست: زەرغام ئیسماعیل - سەعد عەبدولئەمیر - ئەمجەد عەتوان - عەلی حوصنی - شێركۆ كەریم
هێرشبەر: حەمادی ئەحمەد
لە هەڵبژاردەی ئۆڵۆمپی عێراق دوو یاریزانی كورد بانگهێشتكراوە ئەوەیش هاوبێر مستەفا، كە لە خولی پلە دووەمی هۆلەندە یاری دەكات و شێركۆ كەریم، كە لە یانەی گراسهۆبرزی سویسری یاری دەكات.
ئەم یارییە لە كەناڵەكانی (عێراقیە سپۆرت، بی ئین سپۆرت 2، كەناڵی دوری و ئەلكاس، ئەبو زەبی سپۆر) بەشێوەیەكی خۆرایی پەخش دەكرێت.
لەم یارییە هەڵبژاردەی عێراق بە درێسی سەوز یاریدەكات و دانیمارك بە درێسی سۆر، بەم پێی ئامارە مێژوویەكان هەڵبژاردەی ئۆڵۆمپی عێراق لە پێنج ئۆڵۆمپیاد بەشداریكردووە تا ئێستا لە یەكەم یاری تووشی شكست نەهاتووە، كاتێك لە دوو یاری سەركەوتوو بووە و لە دوو یاریش یەكسانبووە.
رێبین رەمزی