لە چوارچێوەی یارییەكانی قۆناغی هەشتەمی دووەمین پاڵەوانێتی كۆنیفا، لە یاریگای دینامۆ لە شاری سۆخۆمی پایتەخی ئەبخازیا هەردوو هەڵبژاردەی كوردستان و پادانیا رووبەرووی یەكتربوونەوە، لە یارییەكی بەهێزدا كاتی یاسایی یارییەكە بە ئەنجامی (2-2)گۆڵ بۆ هەردوو لا یەكسانبوون.
گۆڵەكانی هەڵبژاردەی كوردستان لە رێگەی یاریزانان جاسم حاجی و یاریزانێكی هەڵبژاردەی پادانیا بەهەڵە تۆماركرا، و گۆڵەكانی پادانیا لە رێگەی یاریزانان ڤییری و ماركۆ گراڤێڵی تۆماركرا.
یارییەكە راستەوخۆ چووە لێدانی یەكلاكەرەوەی سزا، كە تیاییدا هەڵبژاردەی پادانیا توانی سەركەوتن بە دەستبهێنێت بەئەنجامی (7-6) گۆڵ، كاتێك هەردوو یاریزانی هەڵبژاردەی كوردستان كۆسرەت بایز و كامەران عەلی لێدانی سزایان تۆمار نەكرد و هەریەكە لە یاریزانان (میران خەسرەو، خالید موشیر، دیار رەحمان، فەرحان شوكر، هونەر ئەحمەد، محەمەد سابیر) توانیان گۆڵ تۆماربكەن.
بەم ئەنجامە هەڵبژاردەی نیشتمانی كوردستان ماڵئاوایی لە پاڵەوانێتیەكە كرد و رۆژی هەینی كاتژمێر 8ی شەو یاری دیاریكردنی ریزبەندی پاڵەوانێتیەكە لەگەڵ دۆراوی یاری نێوان هەردوو هەڵبژاردەی پەنجاب و ئەرمینیای رۆژئاوا یاری دەكات.
رێبین رەمزی