كۆكە Cough بریتییە لە كاردانەوەیەكی خۆویست، یان خۆنەویستانەی دەرپەڕاندنی خێرای هەوا لە سییەكانەوە بە مەبەستی پاككردنەوەی قوڕگ و رێڕەوەكانی هەناسە لە هەر تەنێكی بیانی، یان میكرۆب، شلە، دەردراو، یان هەر ماددەیەكی ورووژێنەر. هۆكاری زۆربەی حاڵەتەكانی كۆكە دەگەڕێتەوە بۆ هەوكردنێكی ڤایرۆسی كە خۆی چاك دەبێتەوە. بەشی زۆری حاڵەتەكانی كۆكەی كورتخایەن لەبەر هەوكردنەكانی بەشی سەرەوەی رێڕەوەكانی هەناسە روودەدەن، بۆنموونە: هەڵامەت، ئەنفلوەنزا، هەوكردنی قوڕقوڕاگە، هاوكات هەوكردنەكانی بەشی خوارەوەی رێڕەوەكانی هەناسە بەگشتی درێژخایەنن، بۆنموونە: هەوكردنی بۆڕی هەناسە، هەوكردنی شانەی سییەكان. كۆكەی شەوانە بەگشتی دەكەوێتە نێو سنووری كۆكەی درێژخایەن كە هۆكارەكانی بریتین لە: رەبو Asthma، هەوكردنی درێژخایەنی بۆڕی هەناسە كە زیاتر پەیوەستە بە جگەرەكێشان، كۆبوونەوەی لینجە دەردراو لە بەشی پشتەوەی لووت Postnasaldrip، گەڕانەوەی ترشەڵۆكی گەدە بۆ ناو سوورێنچك GERD، هەڵامەت، ئەنفلوەنزا، هەستەوەری بەرانبەر بە دوكەڵ، ماددەی كیمیایی، تۆز و خۆڵ، یان بۆن و سپرای قژ، لە هەندێك حاڵەتی دەگمەنیشدا هۆكارەكان بریتین لە سیلی سییەكان TB، شێرپەنجەی سییەكان، هەوكردنی سییەكان بە كەڕوو.