هۆكاری نزیكەی 5%ی حاڵەتەكانی شێرپەنجە بۆماوەییە، هۆكاری 95%ی حاڵەتەكان دەرەكین، بۆ نموونە ستایلی ژیان وەكو جگەرەكێشان، قەڵەوی، كەمی مەشقی بەدەنی، خۆراكی ناهاوسەنگ ...تاد، هەموو ئەمانە تا رادەیەكی زۆر لەژێر كۆنترۆلی مرۆڤدان. بە وردەكاری زیاترەوە، هۆكارەكان بەم شێوەیە پۆڵێن كراون: 50% لەبەر خۆراكی ناڕێك یان ناهاوسەنگ Poor diet، 25% ماددەی كیمیایی زیانبەخش یان پیسكارەكانی ژینگە و دەوروبەر، 25% هەوكردن. سترێس یان باری دەروونی رۆڵی هەیە، بەڵام تا ئێستا رێژەكەی لە پۆلێنی هۆكارەكارەكاندا بە وردی دیار نەكراوە بەتایبەتی كە رێژەی بەرزی هۆرمۆنەكانی پەیوەست بە سترێس لە نەخۆشانی شێرپەنجە بەدی دەكرێت. شێرپەنجە نەخۆشییەكی گشتیی لەشە، دەبێتە هۆی لاوازكردنی سستمی بەرگری لەش، كەمبوونەوەی ئۆكسجین، تێكچوونی هاوسەنگی هۆرمۆنەكان..تاد ئەمانەش ئەگەری نەخۆشییەكانی تر و بڵاوبوونەوەی شێرپەنجە زیاتر دەكەن. بەگشتی، نەهێشتنی یان رێگرتن لە هۆكارەكانی تووشبوون هەنگاوێكی گرنگە بۆ چارەسەركردنی شێرپەنجە. كەواتە هاوسەنگكردنی خۆراك، ئەنجامدانی مەشقی بەدەنی رۆژانە، كۆنترۆلكردنی كێشی لەش، دووركەوتنەوە لە جگەرەكێشان، هەنگاوی كاریگەرن بۆ خۆپارستن لە شێرپەنجە.