پێكهاتەكانی قەرنابیت Cauliflower رۆڵیان هەیە بۆ خۆپاراستن لە چەندین جۆری شێرپەنجە وەكو شێرپەنجەی میزڵدان، مەمك، كۆڵۆن، پرۆستات، هێلكەدان. قەرنابیت بایەخی تەندروستی هەیە بۆ خۆپاراستن لە شێرپەنجە چونكە سوودی بۆ 3 سستمی لەش هەیە: سستمی رزگاربوون لە ماددەی زیانبەخش Detox system، سستمی دژەئۆكسان Antioxidant system، سستمی هەوكردن و دژەهەوكردن Anti-inflammatory system. تێكچوونی باڵانسی هەر یەكێك لەم 3 سستەمەدا ئەگەری تووشبوون بە شێرپەنجە زیاد دەكات، هەورەها تێكچوونی باڵانس لە هەر 3 سستەمەكەدا ئەگەری تووشبوون بە شێرپەنجە زۆر زیاتر دەكات. پێكهاتە گرنگەكانی قەرنابیت بریتین لە: ماددەی ئەلیسین Alice كە دژەئۆكسانە و ئەگەری توووشبوون بە نەخۆشی دڵ و جەڵتەی مێشك كەم دەكاتەوە، ماددە دژەئۆكسانە فلاڤۆنۆیدەكان Flavonoidsو كارۆتینۆیدەكان Carotenoids كە رۆڵیان هەیە بۆ خۆپاراستن لە شێرپەنجە، كانزای سیلینیۆم كە بە هەماهەنگی لەگەڵ ڤیتامین C رۆڵی هەیە بۆ بەهێزكردنی سستمی بەرگری لەش بەتایبەتی دژی هەوكردنە میكرۆبی و ڤایرۆسییەكان، ریشاڵی تواوە كە ئاستی كۆلیستیرۆل تا رادەیەكی باش دادەبەزێنێت و كۆڵۆن لە شێرپەنجە دەپارێزێت، ترشی فۆلیك كە گرنگە بۆ گەشەی خانەكان و پاراستنی كۆرپە لە سەقەتی زگماكی. بۆ خۆپاراستن لە شێرپەنجە، هەوڵ بدە كە بە لای كەم هەفتانە 2- 3 جار قەرنابیت بخۆیت.