لێكۆڵینەوەكان جەخت لەوە دەكەنەوە كە كەمكردنەوەی وزەی خۆراكی لە رێگای كەمتر خواردن سوودی زۆری بۆ تەندروستی هەیە بەتایبەتی لە رێگای رێكخستنی سستمی هۆرمۆنەكان كە كۆنترۆلكردنی ئارەزووی خواردن و كرداری بەتەمەنداچوون، هەروەها كۆنترۆلكردنی كێشی لەش و خۆپاراستن لە بەرزبوونەوەی ئاستی كۆلیستیرۆل و خۆپاراستن لە نەخۆشییە درێژخایەنەكان كە لە كوالیتی ژیان و ساڵەكانی تەمەن كەم دەكەنەوە وەكو نەخۆشیی خوێنبەرەكانی دڵ و شەكرە و بەرزبوونەوەی پەستانی خوێن. هەتا زیاد خواردنی خۆراكی باش زیانی تەندروستی لێدەكەوێتەوە، بۆ نموونە زیاد خواردنی چەوریی ئاژەڵی كە بە چەوریی خراپ ناسراوە دەبێتە هۆی بەرزبوونەوەی كۆلیستیرۆل و زیادبوونی كێشی لەش، لە لایەكی دیكەوە زیاد خواردنی زەیتی زەیتوونیش كە بە باشترین زەیت لە قەڵەم دەدرێت لە رووی بەهای خۆراكی و بایەخی تەندروستییەوە دەبێتە ئەگەری زیادبوونی كێشی لەش، چونكە 1 گرام چەوریی ئاژەڵی یان زەیتی زەیتوون 9 كالۆری وزە لەخۆدەگرن، واتە هەمان بڕی وزە بە لەش دەبەخشن. زیادبوونی كێشی لەش و قەڵەوی هۆكارێكی راستەقینەیە كە تەندروستی بە توندی دەخاتە مەترسییەوە و لە درێژی تەمەن كەم دەكاتەوە كە بە نزیكەی 9 ساڵ دەخەمڵێنرێت. هەوڵ بدە كە بەرە بەرە ژەمە خۆراكییەكانت بچووك بكەیتەوە بە مەرجێك لەسەر حیسابی ماددە خۆراكییە گرنگەكان نەبێت كە رۆژانە بە بڕی دیاریكراو پێویستن و ناكرێ لەژێر هیچ بارودۆخێكدا دەست بەرداریان بین وەكو ڤیتامین و كانزا و ریشاڵ و ماددە دژەئۆكسانەكان Antioxidants.
