مۆبایلەكان Cell phones لەوانەیە كە زێتر لە 40 ماددەی ژەهراوی و كانزا قورسەكان لەخۆبگرن. ئەگەرچی تا ئێستا مەترسییەكانی ئەم ماددانە بۆ بەكارهێنەرانی مۆبایل بە تەواوی یەكلا نەكراوەتەوە، بەڵام ئەمە گومانی تێدا نییە كە پاش لەكاركەوتن و فڕێدانی مۆبایلەكان مەترسییەكان بە تەواوی بەرجەستە دەبن. بە بۆچوونی پسپۆرانی تەندروستی هێشتا هیچ مۆبایلێك بێ مەترسی نییە، هەموو مۆدێل و ماركەكان ئاستی جیاواز لە كانزایەكانی برۆم Bromine، كلۆر Chlorine، قوڕقوشم Lead، كادمیۆم Cadmium، هەروەها جیوە Mercury لەخۆدەگرن، هەندێكییان لە هەندێكیان كەمتر ژەهراوین. لە لێكۆڵینەوەكان لەسەر 36 جۆری مۆبایلدا هاتووە كە پارچەكانیان لە نزیكەی 35 ماددەی كیمیایی و كانزای قورس پێكهاتووە، بەڵام زیاتر جەخت لەسەر 12 توخم و ماددەی كیمیایی دەكرێتەوە بەتایبەتی كلۆر، بڕۆم، كادمیۆم، جیوە، قوڕقوشم. پێویستە ئەم راستییە زانستییە بزانرێت كە ئەم ئامێرە ئەلیكترۆنییانە مەترسی شاراوەیان تێدایە لەو كاتەی كە ئەم كانزا قورسانە بۆ چەندین ساڵ لە ژینگەدا دەمێننەوە و دەبنە هۆی زیادبوونی رێژەی قوڕقوشم و كانزا قورسەكانی دیكە لە ئاودا و زیان بە تەندروستی مرۆڤ و ئاژەڵیش دەگەیەنن. گرفتەكە لەوەدایە كە مۆبایلی لەكاركەوتوو لەبەر بچووكی قەبارەكەی فڕێ دەدرێتە ناو سەللەی زبڵەوە. ئەمەریكییەكان لە خزمەت تەكنەلۆژیای نوێدا ساڵانە ملیۆنەها مۆبایل فڕێ دەدەنە زبڵدانەوە، بۆ نموونە لە ساڵی 2009 دا نزیكەی 141 ملیۆن مۆبایل فڕێدراون كە تەنیا 12 ملیۆن بۆ ریسایكل یان دووبارە سوود لێوەرگرتن كۆكراونەتەوە، ئەوەی كە ماوە مەترسییە بۆ تەندروستی و ژینگە.