گلیسریدە سیانییەكان Triglycerides لە 3 ترشە چەوری پێكهاتووە، پێكهاتەی كیمیایی زۆربەی چەورییەكانی ناو خۆراك و لەشن، هەروەها لەناو پلازمای خوێنیشدا بە رێژەیەكی دیاریكراو هەیە شان بەشانی كۆلیستیرۆل چەورییەكانی ناو پلازمای خوێن پێكدێنن. لەو كاتەی كە وزەی زیاد لە خۆراكەوە وەردەگریت و بە جوولە سەرفی ناكەیت، ئەوا لە لەشدا دەگۆڕێت بۆ چەوری گلیسریدە سیانییەكان و بۆ خانە چەورییەكان دەگوازرێتەوە و لەوێدا خەزن دەكرێت. هۆرمۆنەكان كۆنترۆڵی رەهابوونی گلیسریدە سیانییەكان لە چەورییە خانەكانەوە دەكەن وەكو سەرچاوەیەكی وزە بۆ لەش لە نێوان ژەمەكانی خۆراكدا. ئاستی ئاسایی گلیسریدە سیانییەكان لە خوێندا وا باشە كە كەمتر بێت لە 150میللیگرام لە هەر 100سانتیمەتر سێجای خوێندا، رێژەی پتر لە 200 ملگم بە ئاستێكی بەرز دادەنرێت. زیادبوونی ئاستی گلیسریدە سیانییەكان لە خوێندا بۆ هەندێك كەس پەیوەندی هەیە بە تووشبوون بە نەخۆشی خوێنبەرەكانی دڵ بەڵام كەمتر لە كۆلیستیرۆلی بەرز. لەوانەشە كە هەندێك نەخۆشی وەكو شەكرەی كۆنترۆلنەكراو ببنە ئەگەری بەرزبوونەوەی ئاستی گلیسریدە سیانییەكان لە خوێندا. بۆ دابەزاندن و خۆپاراستن لە بەرزبوونەوی ئاستی گلیسریدە سیانییەكان لە خوێندا پەیڕەوی چەند هەنگاوێك بكە وەكو: دابەزاندنی كێشی زیادی لەش، چەورییە تێرەكان Saturated Fats لە خۆراكتدا كەم بكەوە (گۆشت و بەروبوومی ئاژەڵی)، ئەلكهول مەخۆرەوە، زیاتر ماسی و سەوزە و میوە بخۆ، دووركەوە لە جگەرەكێشان، رۆژانە بەلای كەم بۆ ماوەی نیو كاتژمێر وەرزش بكە.