ئایا دەزانی كە بەكارهێنانی حەبی مەنع Birth control pills ڕۆڵی هەیە بۆ كەمكردنەوەی ڕێژەی دەردانی چەوری لەچەورییە گلاندەكانی پێستدا، زیپكەی گەنجێتی لەئەنجامی قەتیسەبوونی ئەم چەورییە و خانەكانی پێست لەڕەگی مووەكاندا لەگەڵ هەوكردن بەبەكتریا. ئەگەرچی حەبی مەنع بەدەرمانێكی سەلامەت هەژمار دەكرێت، بەڵام هێشتا چەندین زیانی لابەلای هەیە وەكو: سەرئێشە، گۆڕان لەبڕی خوێنی عادەی مانگانەدا، هەستكردن بەناڕحەتی یان ئازار لەمەمكەكاندا، زیادبوونێكی كەم لەئەگەری تووشبوون بەنەخۆشی دڵ و بەرزبوونەوەی پەستانی خوێن و گرفت لەمەیینی خوێندا. بۆیە هەرگیز نابێ كەس لەخۆڕا بەبێ ئاگاداری دكتۆر حەبی مەنع یان هیچ حەبێكی تر بۆ زیپكە و بۆ هەر مەبەستێكی دیكە بەكاربێنێت. ئەو كەسانەی نابێ حەبی مەنع بەكاربێنن بریتی لە: ئەو ئافرەتانەی كە تەمەنیان لەسەرووی 35 ساڵە و جگەرەكێشن، ئەوانەی كە مێژووی تووشبوونیان هەیە بەنەخۆشی لەكۆئەندامی دڵ و سووڕاندا، ئەوانەی كە مێژووی تووشبوونیان هەیە بەشێرپەنجەی مەمك یان منداڵدان یان شێرپەنجەی جگەر، ئەوانەی كە مێژووی تووشبوونیان هەیە بەگرفتی مەیینی خوێن لەقاچ یان سییەكاندا.
