نهێنی لەپاڵ سوودەكانی چای سەوز Green Tea ئەو ماددە دژەئۆكسانانەن كە تەندروستی دەپارێزن. چای سەوز ڕێژەیەكی بەرزی لەماددە پۆلیفینۆلەكان Polyphenols تێدایە كە گەشەی خانە شێرپەنجەییەكان ڕادەگرن و لەناویان دەبات بێ ئەوەی كە زیان بەخانە دروستەكان بگەیەنێت، هەروەها یارمەتی دابەزاندنی ئاستی كۆلیستیرۆلی خراپ LDL لەخوێندا دەدات كە بەرپرسە لەتووشبوون بەنەخۆشی دڵ و جەڵتەی مێشك. چای سەوز سوودی هەیە بۆ كۆنترۆڵكردنی ئاستی شەكری خوێن و پەستانی بەرزی خوێن، لەوانەشە كە مرۆڤ بپارێزێت لەتووشبوون بەنەخۆشی شەكرە و بەرزبوونەوەی پەستانی خوێن. پێكهاتەكانی چای سەوز دژی ڤایرۆس و بەكتریا كاریگەرییان هەیە بەتایبەتی ڤایرۆسەكانی هەڵامەت و سكچوون، پاشان ئێسكەكان دەپارێزن لەپووكانەوە. ماددە كاتێچینەكان Catechins كە پێكهێنەری سەرەكی چای سەوزن، سوودیان هەیە بۆ خۆپاراستن لەبۆنی ناخۆشی دەم، ئەمە جگە لەپێكهاتەكانی تری چای سەوز وەكو كۆمەڵەی ڤیتامین B كە گرنگن بۆ كرداری زیندەپاڵی كاربۆهیدراتەكان، ڤیتامین C كە شەكەتی سووك دەكات، فلاڤۆنۆیدەكان Flavonoids كە ماددەی دژەئۆكسانن و یارمەتی پتەوی دیواری خوێنبەرەكان دەدەن. سوودە تەندروستییەكانی تری چای سەوز بریتین لە: سووككردنی نیشانەكانی هەوكردنی قۆڵۆن و گرژبوونی قۆڵۆن، سووككردنی نیشانەكانی هەوكردنی ڕۆماتیزمی جومگەكان، بەهێزكردنی سستەمی بەرگری لەش دژ بەهەوكردنەكان.