ئافرەتان دەیانەوێ هەمیشە جوان و خنجیلانە و بەرچاو بن، مەرج نییە، تۆی خانمیش تەنیا بە كەرەستەی ماكیاژ و بۆیە و داو و دەرمان خۆت جوان بكەیت، چونكە رێگەی دیكەش هەن كە جوانتر و سەرنجڕاكێشترت دەكەن. كاتێك دەتەوێت پرچت ئەوەندە جوان و رەنگین بێ، یان نیازت وایە پێستت پاك و سپی و ناسك بێ، رەنگە كەرەستەیەكی زۆری ماكیاژ و كرێم بەكاربهێنیت، بەڵام لە ئەنجامدا هەست دەكەی كاریگەری نابێت و چ سوودت لەو هەموو كەرەستەیە وەرنەگرتووە، رەنگە ئاگاداری میوە و سەوزەكانیش نەبیت، كە سەرچاوەی جوانی سرووشتین بۆ لەش و لارت، بەتایبەت شەربەت و ئەو خواردنەوانەی لە میوە و سەوزەكان دروست دەكرێن، لەم زانیارییانەی خوارەوە دەتوانی سوود لەو شەربەت و خواردنەوانە وەربگری كە لە ماڵەكەتدا دەتوانی میوە و سەوزە لە خەڵاتە بدەیت و شەربەتێكی خۆشی لێی دروست بكەیت و سوودی زۆریشی لێ ببینیت:
- شەربەتی سێو، بەهۆی ئەوەی كە سێو بڕێكی زۆری ڤیتامین و ئاسنی زۆری تێدایە، بۆیە خواردنەوەی ئەو خواردنەوەیە بۆ پرچ و پێست بەسوودە.
- شەربەتی گێزەر، خواردنەوەی ئەو خواردنەوەیە سوود بە جوانی و توند و تۆڵی پرچ دەگەیەنێت، هەروەها پێستیش پاك دەكاتەوە لە پەڵەی رەش و وردە خاڵ.
- شەربەتی شێلم، گرنگی تەواوی هەیە بۆ جوانی و ناسكیی پێست، ناوەوەی خانەكانی پێیست لە وردە ژەهر و گرێ بچووك پاك دەكاتەوە و رایدەماڵێت. ئەگەر توانیت هەفتانە دوو كووپی گەورە گیراوەی شێلم بگرەوە و نۆشی بكە، ئینجا ئەنجامەكەی دەزانیت.
- ئەگەر توانیت و پێت خورایەوە، شەربەتی كەرەوز ئامادە بكە، چونكە سوودێكی زۆری هەیە بۆ جوانی پێست و بریقەی نینۆكەكان و تەنانەت نینۆكەكانت بەهێزتر و چالاكتر دەكەن، هەروەها رەنگی سپیتی بۆ ددان و نینۆكیش جوانتر دەردەخات.
- خەیاریش دەتوانی بە دوو جۆر سوودی لێوە وەربگریت، كە وەك پارچەی بچووك لەسەر چاوانت دایبنێیت، بۆ لابردنی پەڵەی ژێر و سەرەوەی چاوەكانت، هەروەها ئەگەر بیكەیت بە شەربەتی خەیاریش، نەرمی و ناسكی بە پێستت دەدات و پرچیشت خاو دەكاتەوە و مووەكانی نەرم دەكات.
- گیراوە و شەربەتی ئەناناس هەم تامێكی خۆشی هەیە و هەم دژە ئۆكسیدی تێدایە، وردە خاڵی رەش و گرێ و قۆڵت و چاڵی پێست لادەدات و بە سرووشتی پڕ دەكاتەوە، بەمەش دەتوانی وردە چاڵەكانی رووخسارت چارەسەر بكەیت.
- شەربەتی تەماتە، جۆرێكی دیكەی ئەو شەربەتانەیە كە سوودی هەیە بۆ جوانی دەستەكانت، كە بە دژە ئۆكسید بەناوبانگە و ئەو خاڵە بچووكانەی لە نێو پێستی دەست و قاچە رادەماڵێت و بەشێوەیەكی سرووشتی پڕیان دەكاتەوە.