هەندێ لە خانمان حەز بە بەستنی پرچیان دەكەن، هەندێكی دیكەش حەز ناكەن، ئەگەرچی ناچاریشن لە كاتی كاری رۆژانەیان، یان لە كاتی ئیشكردنیان لە ماڵەوە، زۆر جار وا پێویست دەكات كە پرچیان بەستراو بێت، تەنیا ئەو كاتانە نەبێت وەك لە زەماوەند و بۆنە و ئاهەنگەكان، یان لە كاتی پشوودان و لەو كاتەی لە ماڵەوە و نیازیان وایە بخەون. ئەوانەی خولیای پرچ بەستنن، بۆ هەمیشە وەك كچێكی بچووك و بەناز دەردەكەون، لێرەدا چەندین ئامۆژگاری لە بارەی پرچ بەستنەوە دەخەینەڕوو:
-هەرگیز پرچت مەبەستە كاتێك قژت تەڕە، چونكە لەو كاتەدا قژ لەوپەڕی توند و تۆڵیدایە، كاتێك پرچیشت دەبەستی، ئیدی پاڵەپستۆ لەسەر رەگی مووەكان زیاتر دەبێت و پرچت هەڵدەورێنێت.
- ئەگەر هەر پێویستت بوو پرچت ببەستی كە تەڕە، دەتوانی تەڵەكان بە دەست لە یەكتر جیا بكەیتەوە، پاشان وەك لەفێك بە دەوری تەڵە مووەكانی دیكەی بخولێنەوە و بیبەستە.
- وا چاكە دوای هەر بەستنێك، تەڵە پرچێك بهێڵیتەوە و لە دەوروبەری ئەو پارچە بەستراوە كۆ بكەیتەوە، واتە داو داوی جیا هەبێت و هەمووی بەیەكەوە مەبەستە.
- وا چاكە بەشی دواوەی پرچت بەرەو پێشەوە بهێنیتەوە و پاشان لەگەڵ پرچی پێشەوەی سەر تێكەڵیان بكەیت و بیبەستیت، تا بەشی دواوە ئازاری پێنەگات و بكەوێت.
- ئەگەر ویستت ناسك و جوان و سەرنجڕاكێش بیت، پرچت بەلایەكی سەرتدا بدە و ئینجا بیبەستە، با راستەوخۆ لە دواوەی پرچت نەبێت.
- باوترین مۆدەی پرچ بەستن، بریتییە لە شێوازی فەڕەنسی، كە سەرەتا پرچت لوول بكە و پاشان ببەستە، ئەو شێوازە پێیدەگوترێت (بەنانی).