پردی دەلال بە یەكێك لە كۆنترین پردەكانی كوردستان دادەنرێ، كە دەكەوێتە رۆژهەڵاتی شاری زاخۆ لەسەر رووباری خابوور، لەسەر دروستكردنی ئەو پردە دوو بۆچوون هەیە، هەندێك دەڵێن: میرنشینەكانی بادینان ئەو پردەیان دروستكردووە، هەندێكی دیكەش دەڵێن: لەلایەن رۆمانییەكان دروستكراوە، درێژی ئەو پردە دەگاتە (114) مەتر و پانییەكەشی (4.70) مەترە، بەرزیشی دەگاتە (15.5) مەتر، ئەو پردە بە چەندین ناو ناودەبرێت، بەڵام زیاتر بە پردی دەلال ناسراوە، هەندێك دەڵێن: پردی گەورە، هەندێكی دیكەش بە پردی عەباسی ناوی دەبەن. لە ساڵی (1909) شوێنەوارناسێكی بەریتانی بە ناوی (كونرادبرۆیس) سەردانی ئەو پردەی كردووە و ناوی ناوە (پردی خابوور). وەك دەیگێڕنەوە، ئەو پردە داستانێكی هەیە بەوەی لە سەردەمی میرنشینەكانی بۆتان، داوایان لە یەكێك كردووە كە ئەو پردە دروست بكات، بەڵام هەر كاتێك گەیشتۆتە ناوەڕاستی پردەكە، داڕماوە، دواتر جارێك ئافرەتێك بە ناوی (دەلال) هاتووە خواردن و شتی بۆ ئەو كەسە هێناوە كە پردەكەی دروستكردووە، لەو كاتە بەو ئافرەتە دەڵێت ئەگەر جەستەی تۆ لە ناوەڕاستی پردەكە دانێم جێگیر دەبێت، ئەویش رازی دەبێت و ئیدی جەستەی دەلال دەخاتە ناوەڕاستی پردەكە و كارەكەی سەردەكەوێت، ئەو وێنە كۆنەش لە ساڵی (1909) لەلایەن خانمە شوێنەوارناس و گەڕیدە (گیرۆترۆد بێل) وێنەكەی گیراوە، كە ئەو كاتە دەوروبەری ئەو پردە چۆڵەوانی بووە، تا ئێستاش چەندین جار بەشێكی ئەو پردە رووخاوە، یان داڕماوە، بەڵام هەر وەك شوێنەوارێكی دێرینی كوردستان دەمێنێتەوە.