شاندێكی نوێنه‌رایه‌تی حكومه‌تی هه‌رێمی كوردستان كه‌ پێكهاتبوو له‌ د. دلاوه‌ر ئاژگه‌یی و ستافی نوێنه‌رایه‌تی حكومەتی هەرێم له‌گه‌ڵ وه‌زیری ده‌ره‌وه‌ی هه‌رێمی فلانده‌رز كۆبووه‌.


له‌ چوارچێوه‌ی پته‌وكردن و په‌ره‌پێدانی په‌یوه‌ندییه‌كانی حكومه‌تی هه‌رێمی كوردستان له‌گه‌ڵ هه‌رێمی فلانده‌رزی به‌لجیكا و بۆ به‌دواداچوون و جێبه‌جێكردنی بڕیار و به‌ڵێنه‌كانی سه‌رۆك وه‌زیرانی فلانده‌رز له‌ كاتی سه‌ردانی بۆ هه‌رێمی كوردستان كۆبوونه‌وه‌كی فرا‌وانی ئه‌نجام دا له‌گه‌ڵ وه‌زیری ده‌ره‌وه‌ و ستافی وه‌زاره‌تی ده‌ره‌وه‌ی هه‌رێمی فلانده‌رز.


له‌ كۆبوونه‌وه‌كه‌ به‌وردی تیشك خرایه‌ سه‌ر خاڵه‌ گرنگه‌كان و بڕیاری گونجاو دران بۆ سه‌رخستنی پرۆژه‌كانی نێوان هه‌ردوولا و بڕیار درا له‌و شوێنانه‌ی هه‌ردوولا نوێنه‌رایه‌تیان هه‌یه‌ په‌یوه‌ندی و هه‌ماهه‌نگی دروست بكرێت له‌ نێوان نوێنه‌رایه‌تی هه‌ردوولا.


له‌ به‌شێكی تری دانیشتنه‌كه‌ هاوكاری له‌ نێوان زانكۆكانی هه‌ردوولا و هاوكاری مرۆڤی و په‌یوه‌ندی بازرگانی به‌ وردی تاوتوێ كران.


پێشتر سه‌رۆك وه‌زیرانی فلانده‌رز له‌ به‌رده‌م په‌رله‌مانی ئه‌و هه‌رێمه‌ و رۆژنامه‌نووسان سه‌ردانه‌كه‌ی خۆی بۆ هه‌رێمی كوردستان به‌ یه‌كێك له‌ سه‌ركه‌وتووترین سه‌ردانه‌كانی بۆ ده‌ره‌وه‌ی وڵات ناوزه‌د كردبوو.